ise kahte hain apni zat mein mastur ho jaana

ise kahte haiñ apnī zaat meñ mastūr ho jaanā

tire nazdīk aanā aur ḳhud se duur ho jaanā

ilāj-e-tishnagī ye hai ki aañsū pī liye jaa.eñ

kisī mai-kash kā jaise be-piye maḳhmūr ho jaanā

hamārā iḳhtiyār-e-be-talab jabr-e-mashiyyat hai

vafā ke silsile meñ fitratan majbūr ho jaanā

karishma hai ye haq-goī kā varna kaise mumkin thā

mire dil kā amīn-e-azmat-e-mansūr ho jaanā

kisī shai kī kabhī fitrat na badlī hai na badlegī

ki jaise naar kā mumkin nahīñ hai nuur ho jaanā

agar duniyā meñ ġham hī dā.imī shai hai to phir yaaro

abas hai chand lamhoñ ke liye masrūr ho jaanā

mizāj-e-āshiqī kā ye ajab andāz dekhā hai

tumhārā muskurānā dard kā kāfūr ho jaanā

ḳhulūs-e-bāhamī darkār hai hastī kī rāhoñ meñ

koī mushkil nahīñ hai zañg dil se duur ho jaanā

ye ehsās-e-nadāmat hai 'sirāj' apne gunāhoñ par

kabhī ranjūr ho jaanā kabhī masrūr ho jaanā

ise kahte hain apni zat mein mastur ho jaana

tere nazdik aana aur KHud se dur ho jaana

ilaj-e-tishnagi ye hai ki aansu pi liye jaen

kisi mai-kash ka jaise be-piye maKHmur ho jaana

hamara iKHtiyar-e-be-talab jabr-e-mashiyyat hai

wafa ke silsile mein fitratan majbur ho jaana

karishma hai ye haq-goi ka warna kaise mumkin tha

mere dil ka amin-e-azmat-e-mansur ho jaana

kisi shai ki kabhi fitrat na badli hai na badlegi

ki jaise nar ka mumkin nahin hai nur ho jaana

agar duniya mein gham hi daimi shai hai to phir yaro

abas hai chand lamhon ke liye masrur ho jaana

mizaj-e-ashiqi ka ye ajab andaz dekha hai

tumhaara muskurana dard ka kafur ho jaana

KHulus-e-bahami darkar hai hasti ki rahon mein

koi mushkil nahin hai zang dil se dur ho jaana

ye ehsas-e-nadamat hai 'siraj' apne gunahon par

kabhi ranjur ho jaana kabhi masrur ho jaana