ishq abru ka hua zulf-e-rasa se pahle

ishq abrū kā huā zulf-e-rasā se pahle

kyā tamāshā hai ki marte haiñ qazā se pahle

dast-e-rangīñ kā liyā bosa agar chorī se

haath bandhvā.e mire duzd-e-hinā se pahle

us ne poshāk pinhāne kā ye in.aam diyā

Daal lī dil meñ girah band-e-qabā se pahle

yuuñ na haath aa.egā hargiz kisī jāñbāz kā dil

kījiye kuchh to jafā ishq-e-jafā se pahle

kar diyā dard-e-judā.ī ne yahāñ kaam tamām

ham bulāte hī rahe un ko qazā se pahle

sag-e-jānāñ kā ye ehsān na bhūlūñgā kabhī

haDDiyāñ khā.īñ mirī aa ke humā se pahle

mushkileñ naza.a kī ho jaa.eñ sab āsān abhī

lutf farmā.eñ agar aap qazā se pahle

jazb-e-ulfat kī hai tāsīr ki hāthoñ meñ tire

rach gayā ḳhuun mirā rang-e-hinā se pahle

pīchhe ruḳhsār-e-munavvar se ulaTiyega naqāb

pūchh to lījiye aap apnī hayā se pahle

ġhair koī nahīñ taklīf na do hiile ko

haath kāñdhe pe rakho laġhzish-e-pā se pahle

jab chalā qāfila yāroñ kā sū-e-mulk-e-adam

hamīñ tayyār hue bāñg-e-darā se pahle

umr to us kī bahut tuul hai mujh se lekin

jhuk ga.ī merī kamar zulf-e-dotā se pahle

ḳhizr ko vādī-e-vahshat meñ na rakhnā thā qadam

pūchh lenā thā kisī ābla-pā se pahle

is bharose pe gunah karte haiñ 'vahbī' ham rind

rahm kartī hai atā us kī ḳhatā se pahle

ishq abru ka hua zulf-e-rasa se pahle

kya tamasha hai ki marte hain qaza se pahle

dast-e-rangin ka liya bosa agar chori se

hath bandhwae mere duzd-e-hina se pahle

us ne poshak pinhane ka ye inam diya

Dal li dil mein girah band-e-qaba se pahle

yun na hath aaega hargiz kisi jaanbaz ka dil

kijiye kuchh to jafa ishq-e-jafa se pahle

kar diya dard-e-judai ne yahan kaam tamam

hum bulate hi rahe un ko qaza se pahle

sag-e-jaanan ka ye ehsan na bhulunga kabhi

haDDiyan khain meri aa ke huma se pahle

mushkilen naza ki ho jaen sab aasan abhi

lutf farmaen agar aap qaza se pahle

jazb-e-ulfat ki hai tasir ki hathon mein tere

rach gaya KHun mera rang-e-hina se pahle

pichhe ruKHsar-e-munawwar se ulaTiyega naqab

puchh to lijiye aap apni haya se pahle

ghair koi nahin taklif na do hile ko

hath kandhe pe rakho laghzish-e-pa se pahle

jab chala qafila yaron ka su-e-mulk-e-adam

hamin tayyar hue bang-e-dara se pahle

umr to us ki bahut tul hai mujh se lekin

jhuk gai meri kamar zulf-e-dota se pahle

KHizr ko wadi-e-wahshat mein na rakhna tha qadam

puchh lena tha kisi aabla-pa se pahle

is bharose pe gunah karte hain 'wahbi' hum rind

rahm karti hai ata us ki KHata se pahle