ishq aur nang-e-arzu se aar

ishq aur nañg-e-ārzū se aar

dil-e-ḳhuddār par ḳhudā kī maar

aur kyā dekhnā hai zauq-e-nazar

husn aur ā.īñe se ho bezār

shikva-e-jaur hai na shauq-e-karam

yuuñ bhī aanā thā ahl-e-dil ko qarār

shaad ab kyuuñ nahīñ dil-e-maġhmūm

husn ko ḳhud jafā se hai inkār

lutf aisā ki kuchh nahīñ taḳhsīs

jaise sab ke liye khulā bāzār

ek bol ek daam saudā naqd

aur na kuchh bhāv-tāv kī takrār

sikka-e-kam-ayār dāġh-e-jigar

pūchh us kī nahīñ kahīñ zanhār

sañg-rezoñ ke daam uThte haiñ

pārā-e-dil hai muft bhī bekār

sard-mehrī hai biich kī dallāl

jis kā donoñ taraf se hai bevpār

rahan hai us ke naam jo kuchh hai

husn kā naaz ishq kā pindār

ġharaz is rabt se hue haiñ baham

ishq be-kaif o husn kam-āzār

gāñThte haiñ phaTe hue jazbāt

ho ke sayyad bane 'salīm' chamār

ishq aur nang-e-arzu se aar

dil-e-KHuddar par KHuda ki mar

aur kya dekhna hai zauq-e-nazar

husn aur aaine se ho bezar

shikwa-e-jaur hai na shauq-e-karam

yun bhi aana tha ahl-e-dil ko qarar

shad ab kyun nahin dil-e-maghmum

husn ko KHud jafa se hai inkar

lutf aisa ki kuchh nahin taKHsis

jaise sab ke liye khula bazar

ek bol ek dam sauda naqd

aur na kuchh bhaw-taw ki takrar

sikka-e-kam-ayar dagh-e-jigar

puchh us ki nahin kahin zanhaar

sang-rezon ke dam uThte hain

para-e-dil hai muft bhi bekar

sard-mehri hai bich ki dallal

jis ka donon taraf se hai bewpar

rahan hai us ke nam jo kuchh hai

husn ka naz ishq ka pindar

gharaz is rabt se hue hain baham

ishq be-kaif o husn kam-azar

ganThte hain phaTe hue jazbaat

ho ke sayyad bane 'salim' chamar