ishq dushwar nahin KHush-nazari mushkil hai

ishq dushvār nahīñ ḳhush-nazarī mushkil hai

sahl hai koh-kanī shīshagarī mushkil hai

us meñ shāmil hai mirā husn-e-talab bhī ai dost

varna is husn se bedād-garī mushkil hai

lag ga.ī dāman-e-gesū-e-pareshāñ kī havā

hosh meñ aa.e nasīm-e-saharī mushkil hai

masnad-e-lāla-o-raihāñ ho ki ho taḳhta-e-dār

ham-nashīñ chāra-e-āshufta-sarī mushkil hai

ye haqīqat koī arbāb-e-ḳhabar se pūchhe

kis qadar marhala-e-be-ḳhabarī mushkil hai

dil-e-bedār kā ab aur hī aalam hai 'ravish'

lab tak aa jaa.e fuġhān-e-saharī mushkil hai

ishq dushwar nahin KHush-nazari mushkil hai

sahl hai koh-kani shishagari mushkil hai

us mein shamil hai mera husn-e-talab bhi ai dost

warna is husn se bedad-gari mushkil hai

lag gai daman-e-gesu-e-pareshan ki hawa

hosh mein aae nasim-e-sahari mushkil hai

masnad-e-lala-o-raihan ho ki ho taKHta-e-dar

ham-nashin chaara-e-ashufta-sari mushkil hai

ye haqiqat koi arbab-e-KHabar se puchhe

kis qadar marhala-e-be-KHabari mushkil hai

dil-e-bedar ka ab aur hi aalam hai 'rawish'

lab tak aa jae fughan-e-sahari mushkil hai