ishq hai ek kaif-e-pinhani magar ranjur hai

ishq hai ik kaif-e-pinhānī magar ranjūr hai

husn-e-be-pardā nahīñ hotā magar dastūr hai

ḳhastagī ne kar diyā us ko rag-e-jāñ se qarīb

justujū zālim kahe jaatī thī manzil duur hai

le isī zulmat-kade meñ us se mahrūmī kī daad

us se aage ai dil-e-muztar hijāb-e-nūr hai

lab pe mauj-e-husn jab chamke tabassum naam ho

rabbī-arenī kah ke chīḳh uThūñ tū barq-e-tūr hai

nuur āñkhoñ meñ usī kā jalva ḳhud nūr-e-muhīt

diid kyā hai kuchh talātum meñ hujūm-e-nūr hai

aañkh hai jab mahv-e-hairat to numāyāñ hai vahī

fikr ho jab kār-farmā to vahī mastūr hai

dekhtā huuñ maiñ ki hai bahr-e-haqīqat josh par

jo hubāb uTh uTh ke miTtā hai sar-e-mansūr hai

ishq hai ek kaif-e-pinhani magar ranjur hai

husn-e-be-parda nahin hota magar dastur hai

KHastagi ne kar diya us ko rag-e-jaan se qarib

justuju zalim kahe jati thi manzil dur hai

le isi zulmat-kade mein us se mahrumi ki dad

us se aage ai dil-e-muztar hijab-e-nur hai

lab pe mauj-e-husn jab chamke tabassum nam ho

rabbi-areni kah ke chiKH uThun tu barq-e-tur hai

nur aankhon mein usi ka jalwa KHud nur-e-muhit

did kya hai kuchh talatum mein hujum-e-nur hai

aankh hai jab mahw-e-hairat to numayan hai wahi

fikr ho jab kar-farma to wahi mastur hai

dekhta hun main ki hai bahr-e-haqiqat josh par

jo hubab uTh uTh ke miTta hai sar-e-mansur hai