ishq hai us zulf ka sartaj aaj

ishq hai us zulf kā sartāj aaj

hai rasūl-e-husn kī me.arāj aaj

nok-e-mizhgāñ par nahīñ hai laḳht-e-dil

daar par khīñchā gayā hallāj aaj

tark chashm-e-yār ke tevar haiñ aur

ḳhirman-e-tāqat kā hai tārāj aaj

teġh-e-abrū kal paḌī dil par mire

tiir mizhgāñ kā huā āmāj aaj

chūse haiñ us ke misī ālūda-lab

maiñ ne nīlam kā kiyā pokhrāj aaj

vasl kī marzī thī kal us shoḳh kī

phir gayā vo vaqt-e-istimzāj aaj

likkhā hai jo vasf abrū kā 'vaqār'

sher-she.arī se na le kyuuñ baaj aaj

ishq hai us zulf ka sartaj aaj

hai rasul-e-husn ki mearaj aaj

nok-e-mizhgan par nahin hai laKHt-e-dil

dar par khincha gaya hallaj aaj

tark chashm-e-yar ke tewar hain aur

KHirman-e-taqat ka hai taraj aaj

tegh-e-abru kal paDi dil par mere

tir mizhgan ka hua aamaj aaj

chuse hain us ke misi aaluda-lab

main ne nilam ka kiya pokhraj aaj

wasl ki marzi thi kal us shoKH ki

phir gaya wo waqt-e-istimzaj aaj

likkha hai jo wasf abru ka 'waqar'

sher-sheari se na le kyun baj aaj