ishq har-chand masaib se pareshan na hua
ishq har-chand masā.ib se pareshāñ na huā
na huā husn magar tāba-e-farmāñ na huā
laakh duniyā ne ye chāhā ki pareshāñ ho magar
maiñ tire ġham kī hifāzat meñ pareshāñ na huā
dil kī āvāz ho mahrūm-e-asar kyā ma.anī
ishq kāfir hai agar husn musalmāñ na huā
darpai uqda-e-hastī hai azal hī se bashar
lekin ik ḳhaak ke zarre kā bhī irfāñ na huā
dil meñ har ḳhuun kā qatra hai talātum ba-kanār
jo magar aañkh se Tapkā vahī tūfāñ na huā
to vo āzād ki be-vaj.h hai mujh se bhī gurez
maiñ vo majbūr ki dushman se bhī nālāñ na huā
apnī paiġhām-navā.ī ke natā.ej meñ mujhe
fikr-e-zindāñ to rahā hai ġham-e-zindāñ na huā
jis ke mashrab meñ mohabbat ho mohabbat kā javāb
merī taqdīr meñ aisā koī insāñ na huā
ek hī jalve se 'ehsān' nazar haT na sakī
mujh se kuchh us ke sivā kār-e-numāyāñ na huā
ishq har-chand masaib se pareshan na hua
na hua husn magar taba-e-farman na hua
lakh duniya ne ye chaha ki pareshan ho magar
main tere gham ki hifazat mein pareshan na hua
dil ki aawaz ho mahrum-e-asar kya mani
ishq kafir hai agar husn musalman na hua
darpai uqda-e-hasti hai azal hi se bashar
lekin ek KHak ke zarre ka bhi irfan na hua
dil mein har KHun ka qatra hai talatum ba-kanar
jo magar aankh se Tapka wahi tufan na hua
to wo aazad ki be-wajh hai mujh se bhi gurez
main wo majbur ki dushman se bhi nalan na hua
apni paigham-nawai ke nataej mein mujhe
fikr-e-zindan to raha hai gham-e-zindan na hua
jis ke mashrab mein mohabbat ho mohabbat ka jawab
meri taqdir mein aisa koi insan na hua
ek hi jalwe se 'ehsan' nazar haT na saki
mujh se kuchh us ke siwa kar-e-numayan na hua
Source:
Ghazaliyat-e-ahsaan Danish (Pg. 89)
- Author: Shabnam Parveen
-
- Edition: 2006
- Publisher: Asghar Publishers
- Year of Publication: 2006
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.