ishq hun to sham-e-husn-e-yar ka parwana hun

ishq huuñ to sham-e-husn-e-yār kā parvāna huuñ

husn huuñ to maiñ charāġh-e-ka.aba-o-but-ḳhāna huuñ

merī hastī kār-farmā hai jahāñ tak dekhiye

riñd huuñ maiñ jaam huuñ maiñ sāqi-e-mai-ḳhāna huuñ

koī dīvāna mujhe kahtā hai saudā.ī koī

vāqi.a ye hai ki mahv-e-jalva-e-jānāna huuñ

maiñ huuñ un kī ibtidā aur vo haiñ merī intihā

ḳhatm ho jo husn par vo ishq kā afsāna huuñ

haañ jalā de ḳhaak kar de phūñk de hastī mirī

tū to sham-e-husn hai maiñ to tirā parvāna huuñ

tum ho aalam tum se hai aalam magar bā-īñ-hama

tum ho ālam-āshnā maiñ tum se bhī begāna huuñ

maiñ hudūd-e-shar.a se bāhar nahīñ 'bismil' magar

kahne do jo kuchh kahūñ dīvāna huuñ dīvāna huuñ

ishq hun to sham-e-husn-e-yar ka parwana hun

husn hun to main charagh-e-kaba-o-but-KHana hun

meri hasti kar-farma hai jahan tak dekhiye

rind hun main jam hun main saqi-e-mai-KHana hun

koi diwana mujhe kahta hai saudai koi

waqia ye hai ki mahw-e-jalwa-e-jaanana hun

main hun un ki ibtida aur wo hain meri intiha

KHatm ho jo husn par wo ishq ka afsana hun

han jala de KHak kar de phunk de hasti meri

tu to sham-e-husn hai main to tera parwana hun

tum ho aalam tum se hai aalam magar ba-in-hama

tum ho aalam-ashna main tum se bhi begana hun

main hudud-e-shara se bahar nahin 'bismil' magar

kahne do jo kuchh kahun diwana hun diwana hun