ishq jab manzil-e-aKHir se guzarta hoga

ishq jab manzil-e-āḳhir se guzartā hogā

ek bhī ashk na āñkhoñ se Tapaktā hogā

ham to jab jāneñ ki jab vaqt hamārā badle

log kahte haiñ badaltā hai badaltā hogā

hogā ai dost yaqīnan vo mire dil kī tarah

jo diyā ruḳh pe havāoñ ke bhī jaltā hogā

aaj Thahrāyā hai ḳhud jis ne mujhe qābil-e-dār

kal vahī merī vafāoñ ko tarastā hogā

sāġhar-e-chashm meñ mai-kash use bharte hoñge

rañg jab aap ke chehre se chhalaktā hogā

jo nazar uThtī hai ban jaatī hai ik mauj-e-ḳhumār

dast-e-sāqī meñ koī jaam chhalaktā hogā

haal 'aḳhgar' ke taḌapne kā sunā jab to kahā

us kī fitrat hī taḌapnā hai taḌaptā hogā

ishq jab manzil-e-aKHir se guzarta hoga

ek bhi ashk na aankhon se Tapakta hoga

hum to jab jaanen ki jab waqt hamara badle

log kahte hain badalta hai badalta hoga

hoga ai dost yaqinan wo mere dil ki tarah

jo diya ruKH pe hawaon ke bhi jalta hoga

aaj Thahraya hai KHud jis ne mujhe qabil-e-dar

kal wahi meri wafaon ko tarasta hoga

saghar-e-chashm mein mai-kash use bharte honge

rang jab aap ke chehre se chhalakta hoga

jo nazar uThti hai ban jati hai ek mauj-e-KHumar

dast-e-saqi mein koi jam chhalakta hoga

haal 'aKHgar' ke taDapne ka suna jab to kaha

us ki fitrat hi taDapna hai taDapta hoga