ishq ka imtihan hai pyare

ishq kā imtihān hai pyāre

aur tū nā-tavān hai pyāre

dil ke is iztirāb se har dam

har haqīqat bayān hai pyāre

terī sarkash-nigār fitrat se

ġham-zada āsmān hai pyāre

fitrat-e-dil hai bas bahak jaanā

ājizī bad-gumān hai pyāre

raqs-e-fariyād se aajiz ho kar

bebasī be-zabān hai pyāre

maiñ giraft-e-visāl kā maarā

aur vo lā-makān hai pyāre

ishq ḳhūn-e-jigar kā tālib hai

tū ki kamzor-e-jān hai pyāre

sar-ba-sajda nigār-e-hastī se

chashm-e-nam hirz-e-jān hai pyāre

ḳhaak bosīda dil kā ho jaanā

is ke shāyān-e-shān hai pyāre

ḳhud se bezār kyoñ huā 'bāliġh'

tujh pe rab mehrbān hai pyāre

ishq ka imtihan hai pyare

aur tu na-tawan hai pyare

dil ke is iztirab se har dam

har haqiqat bayan hai pyare

teri sarkash-nigar fitrat se

gham-zada aasman hai pyare

fitrat-e-dil hai bas bahak jaana

aajizi bad-guman hai pyare

raqs-e-fariyaad se aajiz ho kar

bebasi be-zaban hai pyare

main giraft-e-visal ka mara

aur wo la-makan hai pyare

ishq KHun-e-jigar ka talib hai

tu ki kamzor-e-jaan hai pyare

sar-ba-sajda nigar-e-hasti se

chashm-e-nam hirz-e-jaan hai pyare

KHak bosida dil ka ho jaana

is ke shayan-e-shan hai pyare

KHud se bezar kyon hua 'baaligh'

tujh pe rab mehrban hai pyare