ishq ka shor karen koi talabgar to ho

ishq kā shor kareñ koī talabgār to ho

jins bāzār meñ le jaa.eñ ḳharīdār to ho

hijr ke soḳhta-jāñ aur jaleñge kitne

tuur par baiThe haiñ kab se tirā dīdār to ho

shiddat-e-dard do-pal ke liye kam hotā ki

ġham ke alfāz ke siñgār meñ iz.hār to ho

kab se ummīd lagā.e hue baiThe haiñ ham

ne sahī gar nahīñ iqrār so inkār to ho

kufr ehrām ke parde meñ chhupā dekhā hai

ek aalam hai agar darpai zunnār to ho

ham ne maanā ki sharāfat hai baḌī chiiz magar

kuchh zamāne ko sharāfat se sarokār to ho

ḳhāna-e-dil meñ nahīñ ek kiran kā bhī guzar

saarī duniyā hai agar matla-e-anvār to ho

rāzdārī hī meñ hotā hai sharīfoñ kā hisāb

tujh ko manzūr hai gar bar-sar-e-bāzār to ho

ishq ka shor karen koi talabgar to ho

jins bazar mein le jaen KHaridar to ho

hijr ke soKHta-jaan aur jalenge kitne

tur par baiThe hain kab se tera didar to ho

shiddat-e-dard do-pal ke liye kam hota ki

gham ke alfaz ke singar mein izhaar to ho

kab se ummid lagae hue baiThe hain hum

ne sahi gar nahin iqrar so inkar to ho

kufr ehram ke parde mein chhupa dekha hai

ek aalam hai agar darpai zunnar to ho

hum ne mana ki sharafat hai baDi chiz magar

kuchh zamane ko sharafat se sarokar to ho

KHana-e-dil mein nahin ek kiran ka bhi guzar

sari duniya hai agar matla-e-anwar to ho

raazdari hi mein hota hai sharifon ka hisab

tujh ko manzur hai gar bar-sar-e-bazar to ho