ishq ke muKHbir ko apna raaz-dan samjha tha main

ishq ke muḳhbir ko apnā rāz-dāñ samjhā thā maiñ

rahzan-e-manzil ko mīr-e-kārvāñ samjhā thā meñ

tuur ke qisse ko apnī dāstāñ samjhā thā maiñ

bijliyoñ ke ghar ko apnā āshiyāñ samjhā thā maiñ

sub.h-e-mahshar bahr-e-tajdīd-e-namāz-e-zindagī

sūr-e-isrāfīl ko bāñg-e-azāñ samjhā thā maiñ

aaj mujh par zulm Dhātā hai falak ban kar vahī

jis ko kal tak apnī aahoñ kā dhuāñ samjhā thā maiñ

aah ai shor-e-qayāmat kyā kiyā tū ne sitam

kuchh abhī rāz-e-hayāt-e-jāvedāñ samjhā thā maiñ

mar gayā 'mahmūd' tujh ko DhūñD kar ai zindagī

tū kahāñ aa kar milī tujh ko kahāñ samjhā thā maiñ

ishq ke muKHbir ko apna raaz-dan samjha tha main

rahzan-e-manzil ko mir-e-karwan samjha tha mein

tur ke qisse ko apni dastan samjha tha main

bijliyon ke ghar ko apna aashiyan samjha tha main

subh-e-mahshar bahr-e-tajdid-e-namaz-e-zindagi

sur-e-israfil ko bang-e-azan samjha tha main

aaj mujh par zulm Dhata hai falak ban kar wahi

jis ko kal tak apni aahon ka dhuan samjha tha main

aah ai shor-e-qayamat kya kiya tu ne sitam

kuchh abhi raaz-e-hayat-e-jawedan samjha tha main

mar gaya 'mahmud' tujh ko DhunD kar ai zindagi

tu kahan aa kar mili tujh ko kahan samjha tha main