ishq ki jo lagan nahin dekha

ishq kī jo lagan nahīñ dekhā

vo birah kī agan nahīñ dekhā

qadr muj ashk kī vo kyā jaane

jis ne durr-e-adan nahīñ dekhā

tuj galī meñ jo kuī kiyā maskan

phir kar us ne vatan nahīñ dekhā

aarzū hai ki zulf kuuñ khole

maiñ ne kaalī rayan nahīñ dekhā

lab-e-rañgīñ dikhā ai ma.adan-e-husn

maiñ aqīq-e-yaman nahīñ dekhā

Tuk zamīñ par qadam rakho sājan

aaj naqsh-e-charan nahīñ dekhā

dil abas tishna-lab hai kausar kā

piv kā chāh-e-zaqan nahīñ dekhā

ġhuncha-e-gul kuuñ dekh gulshan meñ

gar tuuñ piv kā dahan nahīñ dekhā

tujh masal ai 'sirāj' bād-e-'valī'

koī sāhab-suḳhan nahīñ dekhā

ishq ki jo lagan nahin dekha

wo birah ki agan nahin dekha

qadr muj ashk ki wo kya jaane

jis ne durr-e-adan nahin dekha

tuj gali mein jo kui kiya maskan

phir kar us ne watan nahin dekha

aarzu hai ki zulf kun khole

main ne kali rayan nahin dekha

lab-e-rangin dikha ai madan-e-husn

main aqiq-e-yaman nahin dekha

Tuk zamin par qadam rakho sajan

aaj naqsh-e-charan nahin dekha

dil abas tishna-lab hai kausar ka

piw ka chah-e-zaqan nahin dekha

ghuncha-e-gul kun dekh gulshan mein

gar tun piw ka dahan nahin dekha

tujh masal ai 'siraj' baad-e-'wali'

koi sahab-suKHan nahin dekha