ishq ki mearaj unki Thokaren khane mein hai

ishq kī me.arāj un kī Thokareñ khāne meñ hai

kūcha-e-jānāñ kī musht-e-ḳhāk ban jaane meñ hai

jāma-e-hastī nazar ke taane aur baane meñ hai

dekh lo kitnī haqīqat mere afsāne meñ hai

vus.at-e-kaunain baḳhshī arsh kā rutba diyā

kaisī gunjā.ish ilāhī dil ke paimāne meñ hai

mah-ruḳhoñ kī Toliyāñ aatī rahīñ jaatī rahīñ

ek aalam hū kā mere dil ke vīrāne meñ hai

rakh ke jis ko shaiḳh ne pī thī kabhī nām-e-ḳhudā

bā.is-e-barkat vahī dastār mai-ḳhāne meñ hai

sāya-e-dīvār kī sūrat maiñ Dhal jaatā vahīñ

do ghaḌī umr us galī se aane aur jaane meñ hai

naaz farmā.e shabāb ai nayyar-e-tābān-e-husn

taar chāñdī kā tirī kanghī ke dandāne meñ hai

apnī sī chal kar na hogī ḳhatm bāzī-e-hayāt

ai bisāt-e-zindagī kah maat kis ḳhāne meñ hai

ishq ki mearaj un ki Thokaren khane mein hai

kucha-e-jaanan ki musht-e-KHak ban jaane mein hai

jama-e-hasti nazar ke tane aur bane mein hai

dekh lo kitni haqiqat mere afsane mein hai

wusat-e-kaunain baKHshi arsh ka rutba diya

kaisi gunjaish ilahi dil ke paimane mein hai

mah-ruKHon ki Toliyan aati rahin jati rahin

ek aalam hu ka mere dil ke virane mein hai

rakh ke jis ko shaiKH ne pi thi kabhi nam-e-KHuda

bais-e-barkat wahi dastar mai-KHane mein hai

saya-e-diwar ki surat main Dhal jata wahin

do ghaDi umr us gali se aane aur jaane mein hai

naz farmae shabab ai nayyar-e-taban-e-husn

tar chandi ka teri kanghi ke dandane mein hai

apni si chal kar na hogi KHatm bazi-e-hayat

ai bisat-e-zindagi kah mat kis KHane mein hai