ishq ki rah mein mar jae zaruri to nahin

ishq kī raah meñ mar jaa.e zarūrī to nahīñ

aadmī had se guzar jaa.e zarūrī to nahīñ

haiñ duā go jo abhī haath pasāre apne

un kī taqdīr sañvar jaa.e zarūrī to nahīñ

maiñ ne maanā ki kaThin rāhguzar hai lekin

rā.egāñ merā safar jaa.e zarūrī to nahīñ

nek a.amāl kī batlā.e fazīlat jo sadā

ḳhair kā kaar vo kar jaa.e zarūrī to nahīñ

chup ke bistar pe jo leTā hai ḳhamoshī oḌhe

ek āvāz se Dar jaa.e zarūrī to nahīñ

gul kī ḳhātir nahīñ phailā mirā dāman lekin

ye faqat ḳhaar se bhar jaa.e zarūrī to nahīñ

jurm kā mujh pe jo ilzām lagā hai 'anjum'

vo kisī aur ke sar jaa.e zarūrī to nahīñ

ishq ki rah mein mar jae zaruri to nahin

aadmi had se guzar jae zaruri to nahin

hain dua go jo abhi hath pasare apne

un ki taqdir sanwar jae zaruri to nahin

main ne mana ki kaThin rahguzar hai lekin

raegan mera safar jae zaruri to nahin

nek aamal ki batlae fazilat jo sada

KHair ka kar wo kar jae zaruri to nahin

chup ke bistar pe jo leTa hai KHamoshi oDhe

ek aawaz se Dar jae zaruri to nahin

gul ki KHatir nahin phaila mera daman lekin

ye faqat KHar se bhar jae zaruri to nahin

jurm ka mujh pe jo ilzam laga hai 'anjum'

wo kisi aur ke sar jae zaruri to nahin