ishq kya kya na raqib-e-sar-o-saman nikla

ishq kyā kyā na raqīb-e-sar-o-sāmāñ niklā

tie collar kī jagah chāk-garebāñ niklā

zikr patlūn kā kyā ek lañgoTī bhī nahīñ

qais tasvīr ke parde meñ bhī uryāñ niklā

us ne chappal se sar-e-rāh tavāzo kar dī

ab to armān tirā ai dil-e-nādāñ niklā

kis qadar jald huā marhala-e-aqd bhī tai

saḳht mushkil hai ki ye kaam bhī āsāñ niklā

merī aaheñ hoñ ki aġhyār ke cigarette kā dhuāñ

jo tirī bazm se niklā so pareshāñ niklā

bārak-allāh ye ehsān kafan-choroñ kā

suur phuñknā thā ki maiñ qabr se uryāñ niklā

ik phaTā boriyā ik jām-e-shikasta 'hāshim'

baad marne ke mire ghar se ye sāmāñ niklā

ishq kya kya na raqib-e-sar-o-saman nikla

tie collar ki jagah chaak-gareban nikla

zikr patlun ka kya ek langoTi bhi nahin

qais taswir ke parde mein bhi uryan nikla

us ne chappal se sar-e-rah tawazo kar di

ab to arman tera ai dil-e-nadan nikla

kis qadar jald hua marhala-e-aqd bhi tai

saKHt mushkil hai ki ye kaam bhi aasan nikla

meri aahen hon ki aghyar ke cigarette ka dhuan

jo teri bazm se nikla so pareshan nikla

barak-allah ye ehsan kafan-choron ka

sur phunkna tha ki main qabr se uryan nikla

ek phaTa boriya ek jam-e-shikasta 'hashim'

baad marne ke mere ghar se ye saman nikla