ishq mein chur bhi hun pairu-e-mansur bhi hun

ishq meñ chuur bhī huuñ pairū-e-mansūr bhī huuñ

ya.anī maiñ tuur bhī huuñ barq-e-sar-e-tūr bhī huuñ

jān-e-‘anvar’ tujhe ma.alūm nahīñ haal mirā

huuñ to duniyā hī meñ duniyā se magar duur bhī huuñ

tū mire TuuTe hue dil kī navāoñ pe na jā

saaz hī saaz nahīñ soz se māmūr bhī huuñ

go har ik baat meñ āzād huuñ muḳhtār huuñ maiñ

phir bhī ik baat kuchh aisī hai ki majbūr bhī huuñ

rag-o-pai meñ to samā fitrat-e-pur-soz to dekh

maiñ faqat ḳhaak nahīñ naar bhī huuñ nuur bhī huuñ

dekhne hī kī ye āñkheñ haiñ nazar ḳhaak nahīñ

jalve āñkhoñ meñ bhī haiñ diid se ma.azūr bhī huuñ

aap ko chāhtā huuñ jab aap ko kho detā huuñ

ye ajab vasl kā aalam hai ki mahjūr bhī huuñ

qābil-e-rahm huuñ ai dost mirā haal na pūchh

huuñ ham-āġhosh bhī aur tujh se bahut duur bhī huuñ

ye to ik jabr hai terā ki maiñ muḳhtār nahīñ

varna tauba maiñ kisī baat meñ majbūr bhī huuñ

ab mohabbat hī mohabbat hai ayaañ aur nihāñ

maiñ isī chādar-e-sīmāb meñ mastūr bhī huuñ

tujh ko ma.alūm hai apnā hī mujhe hosh nahīñ

varna muḳhtār huuñ har chand ki majbūr bhī huuñ

aaj shāyad ġham-e-ehsās kī takmīl huī

ki tire ishq meñ maġhmūm bhī masrūr bhī huuñ

ishq mein chur bhi hun pairu-e-mansur bhi hun

yani main tur bhi hun barq-e-sar-e-tur bhi hun

jaan-e-‘anwar’ tujhe malum nahin haal mera

hun to duniya hi mein duniya se magar dur bhi hun

tu mere TuTe hue dil ki nawaon pe na ja

saz hi saz nahin soz se mamur bhi hun

go har ek baat mein aazad hun muKHtar hun main

phir bhi ek baat kuchh aisi hai ki majbur bhi hun

rag-o-pai mein to sama fitrat-e-pur-soz to dekh

main faqat KHak nahin nar bhi hun nur bhi hun

dekhne hi ki ye aankhen hain nazar KHak nahin

jalwe aankhon mein bhi hain did se mazur bhi hun

aap ko chahta hun jab aap ko kho deta hun

ye ajab wasl ka aalam hai ki mahjur bhi hun

qabil-e-rahm hun ai dost mera haal na puchh

hun ham-aghosh bhi aur tujh se bahut dur bhi hun

ye to ek jabr hai tera ki main muKHtar nahin

warna tauba main kisi baat mein majbur bhi hun

ab mohabbat hi mohabbat hai ayan aur nihan

main isi chadar-e-simab mein mastur bhi hun

tujh ko malum hai apna hi mujhe hosh nahin

warna muKHtar hun har chand ki majbur bhi hun

aaj shayad gham-e-ehsas ki takmil hui

ki tere ishq mein maghmum bhi masrur bhi hun