ishq mein ek aasani hai sab chizen kam-kam kafi hain

ishq meñ ik āsānī hai sab chīzeñ kam-kam kaafī haiñ

ham ko bhī ab vasl-o-hijr ke do hī mausam kaafī haiñ

jā tū us kā ho jā jānāñ us ko ishq zarūrī hai

apne liye to terī yādeñ ġhazleñ aur ram kaafī haiñ

kaun haiñ ye jo bain kare haiñ un se kahiye ghar jaa.eñ

ek janāze meñ ik insāñ aur us ke ġham kaafī haiñ

hoñT hue haiñ jūThe apne dil bhī thoḌā ġhā.eb hai

tum ko mileñge jānāñ aadhe paune hī ham kaafī haiñ

tum kyā ishq karogī 'muditā' ye sar-dardī rahne do

tum ko pareshāñ karne ko to zulfoñ ke ḳham kaafī haiñ

ishq mein ek aasani hai sab chizen kam-kam kafi hain

hum ko bhi ab wasl-o-hijr ke do hi mausam kafi hain

ja tu us ka ho ja jaanan us ko ishq zaruri hai

apne liye to teri yaaden ghazlen aur ram kafi hain

kaun hain ye jo bain kare hain un se kahiye ghar jaen

ek janaze mein ek insan aur us ke gham kafi hain

honT hue hain juThe apne dil bhi thoDa ghaeb hai

tum ko milenge jaanan aadhe paune hi hum kafi hain

tum kya ishq karogi 'mudita' ye sar-dardi rahne do

tum ko pareshan karne ko to zulfon ke KHam kafi hain