ishq mein jo hama-tan dil nahin hone pate

ishq meñ jo hama-tan dil nahīñ hone paate

darḳhur-e-jazba-e-kāmil nahīñ hone paate

jo tirī bazm meñ shāmil nahīñ hone paate

vo kisī bazm meñ dāḳhil nahīñ hone paate

jāda-e-shauq meñ haa.il nahīñ hone paate

marhale saḳht bhī mushkil nahīñ hone paate

har nafas zikr tirā lab pe rahā kartā hai

ham tirī yaad se ġhāfil nahīñ hone paate

hāsil-e-zīst vo lamhe bhī samajhtā huuñ maiñ

jo mirī sa.ī kā hāsil nahīñ hone paate

ḳhāmkārān-e-havas apnī jagah haiñ nā-ahl

ki tire pyaar ke qābil nahīñ hone paate

mah-o-ḳhurshīd ko kyā tāb-e-tajallī hogī

ruḳh-e-raushan ke muqābil nahīñ hone paate

go na iifā hue ab tak magar is ke bā-vasf

tire va.ade haiñ ki bātil nahīñ hone paate

ḳhvāh pahuñcheñ sar-e-manzil na tire dīvāne

lekin āvāra-e-manzil nahīñ hone paate

zindagī azm-o-amal se hai ibārat jin kī

vo safīne kabhī sāhil nahīñ hone paate

sham.a-sāñ dil na jalāne kī ho taufīq jinheñ

bā.is-e-garmī-e-mahfil nahīñ hone paate

kisī dar par bhī jo sar ḳham nahīñ hote 'tālib'

vo kabhī kāsa-e-sā.il nahīñ hone paate

ishq mein jo hama-tan dil nahin hone pate

darKHur-e-jazba-e-kaamil nahin hone pate

jo teri bazm mein shamil nahin hone pate

wo kisi bazm mein daKHil nahin hone pate

jada-e-shauq mein hail nahin hone pate

marhale saKHt bhi mushkil nahin hone pate

har nafas zikr tera lab pe raha karta hai

hum teri yaad se ghafil nahin hone pate

hasil-e-zist wo lamhe bhi samajhta hun main

jo meri sai ka hasil nahin hone pate

KHamkaran-e-hawas apni jagah hain na-ahl

ki tere pyar ke qabil nahin hone pate

mah-o-KHurshid ko kya tab-e-tajalli hogi

ruKH-e-raushan ke muqabil nahin hone pate

go na ifa hue ab tak magar is ke ba-wasf

tere wade hain ki baatil nahin hone pate

KHwah pahunchen sar-e-manzil na tere diwane

lekin aawara-e-manzil nahin hone pate

zindagi azm-o-amal se hai ibarat jin ki

wo safine kabhi sahil nahin hone pate

shama-san dil na jalane ki ho taufiq jinhen

bais-e-garmi-e-mahfil nahin hone pate

kisi dar par bhi jo sar KHam nahin hote 'talib'

wo kabhi kasa-e-sail nahin hone pate