ishq mein kaun kaamyab hua

ishq meñ kaun kāmyāb huā

ishq jis ne kiyā ḳharāb huā

dekhnā hoñgī raḳhna-gar nazreñ

māne-e-dīd agar naqāb huā

rabt-e-bāham ne kar diyā mushkil

us kā maiñ vo mirā javāb huā

jal gayā tuur ġhash hue muusā

jab tirā husn be-naqāb huā

dekh kar aap mere ashkoñ kī

paanī paanī dur-e-ḳhush-āb huā

aa.ī piirī ga.iiñ umañgeñ sab

ḳhatm afsāna-e-shabāb huā

jab chale chaal vo qayāmat kī

uTh ke fitna bhī ham-rikāb huā

is qadar ḳhūgar-e-karam huuñ maiñ

mehr samjhā agar itaab huā

lafz kun kā thā muḳhtasar sā lafz

dar-haqīqat ye ik kitāb huā

bahr-e-ālam meñ sab haiñ dam-bhar ke

ġham hue maiñ huā habāb huā

ab kahāñ rāteñ aish kī 'sābir'

vo zamāna ḳhayāl-o-ḳhvāb huā

ishq mein kaun kaamyab hua

ishq jis ne kiya KHarab hua

dekhna hongi raKHna-gar nazren

mane-e-did agar naqab hua

rabt-e-baham ne kar diya mushkil

us ka main wo mera jawab hua

jal gaya tur ghash hue musa

jab tera husn be-naqab hua

dekh kar aap mere ashkon ki

pani pani dur-e-KHush-ab hua

aai piri gain umangen sab

KHatm afsana-e-shabab hua

jab chale chaal wo qayamat ki

uTh ke fitna bhi ham-rikab hua

is qadar KHugar-e-karam hun main

mehr samjha agar itab hua

lafz kun ka tha muKHtasar sa lafz

dar-haqiqat ye ek kitab hua

bahr-e-alam mein sab hain dam-bhar ke

gham hue main hua habab hua

ab kahan raaten aish ki 'sabir'

wo zamana KHayal-o-KHwab hua