ishq mein kya hathon se kisi ke daman-e-hasti chhuT gaya

ishq meñ kyā hāthoñ se kisī ke dāman-e-hastī chhūT gayā

sham.a koī ḳhāmosh huī yā koī sitārā TuuT gayā

khel rahī hai barq-e-tabassum phuul se nāzuk hoñToñ par

jāniye kis kī maut aa.ī hai kis kā muqaddar phuuT gayā

kaun thā ye bīmār-e-mohabbat jis kī bālīñ par aa kar

husn bhī dariyā dariyā royā ishq bhī siina kuuT gayā

terī bhī tasvīr thī us meñ is kā mujh ko ronā hai

varna dil kī hastī kyā hai shīsha thā so TuuT gayā

sail-e-mohabbat ke thā muqābil dil kā habāb-e-nāzuk bhī

lekin ye ab yaad nahīñ hai kab ubhrā kab phuuT gayā

ishq ne kaisī aafat Dhaa.ī sab maiḳhāne ḳhālī haiñ

kaun-o-makāñ kī saarī mastī un āñkhoñ meñ kuuT gayā

āh-e-mohabbat kā rishta thā nāzuk se bhī nāzuk-tar

ab is ko kis tarah se joḌeñ TuuT gayā so TuuT gayā

avval avval zauq-e-mohabbat thā mastī-e-be-pāyāñ

āḳhir āḳhir vaqt vo aayā sahr-e-mohabbat TuuT gayā

naaz mirī sarmastī ko kyā kyā thā sharāb-o-sāqī par

us kī āñkhoñ ko jo dekhā haath se sāġhar chhūT gayā

raat kisī kī bazm meñ go bedār thā maiñ hushyār thā maiñ

lekin koī aañkh bachā kar dil kī bastī luuT gayā

ishq mein kya hathon se kisi ke daman-e-hasti chhuT gaya

shama koi KHamosh hui ya koi sitara TuT gaya

khel rahi hai barq-e-tabassum phul se nazuk honTon par

jaaniye kis ki maut aai hai kis ka muqaddar phuT gaya

kaun tha ye bimar-e-mohabbat jis ki baalin par aa kar

husn bhi dariya dariya roya ishq bhi sina kuT gaya

teri bhi taswir thi us mein is ka mujh ko rona hai

warna dil ki hasti kya hai shisha tha so TuT gaya

sail-e-mohabbat ke tha muqabil dil ka habab-e-nazuk bhi

lekin ye ab yaad nahin hai kab ubhra kab phuT gaya

ishq ne kaisi aafat Dhai sab maiKHane KHali hain

kaun-o-makan ki sari masti un aankhon mein kuT gaya

aah-e-mohabbat ka rishta tha nazuk se bhi nazuk-tar

ab is ko kis tarah se joDen TuT gaya so TuT gaya

awwal awwal zauq-e-mohabbat tha masti-e-be-payan

aaKHir aaKHir waqt wo aaya sahr-e-mohabbat TuT gaya

naz meri sarmasti ko kya kya tha sharab-o-saqi par

us ki aankhon ko jo dekha hath se saghar chhuT gaya

raat kisi ki bazm mein go bedar tha main hushyar tha main

lekin koi aankh bacha kar dil ki basti luT gaya