ishq mein tere jaan-e-zar haif hai muft mein chali

ishq meñ tere jān-e-zār haif hai muft meñ chalī

tū ne par o sitam-shi.ār ab bhī mirī ḳhabar na lī

koī balā phir aa.egī muft meñ jaan jā.egī

pech meñ ham ko lā.egī zulf-e-siyāh baḌh chalī

aate hī fasl-e-dil-pazīr bole qafas meñ ham-safīr

jis meñ hue the ham asiir lo vahī phir havā chalī

ai gul-e-gulshan-e-vafā be-tire niiñd aa.e kyā

bistar-e-ḳhār se sivā mujh ko hai farsh-e-maḳhmalī

ḳhvāhish-e-justajū-e-yār had se bhī kuchh thī be-shumār

ba.ad-e-fanā mirā ġhubār DhūñDh phirā galī galī

dānish-o-tāqat-o-basar baḌh ga.e saare ham-safar

zād-e-safar kī fikr kar lag rahī hai chalā-chalī

laao pyāla-e-sharāb ghir ke phir aayā hai sahāb

ab nahīñ mere dil ko taab bād-e-bahār phir chalī

ai mah-e-āsmān-jāh tujh sā nahīñ hai kaj-kulāh

le ke falak charāġh-e-māh DhūñDh phirā galī galī

mū-e-safed aa gayā dhabbā ḳhizāb kā lagā

fasl-e-shabā-e-be-vafā dāġh-e-firāq de chalī

kabk kā dil huā figār mor ne jaañ kī nisār

teġh-e-ḳhirām-e-nāz-e-yār chaal na.ī na.ī chalī

bhuul ke koī dosto chāhe na un hasīnoñ ko

ab ye DhiñDhorā pher do lucknow meñ galī galī

go thī ik aag mushta.il jī thā par aisā muzmahil

sham-e-lahad bhī misl-e-dil gaah bujhī kabhī jalī

kahtā hai shoḳh-e-tuñd-ḳhū taab nahīñ dimāġh ko

bā.is-e-dard-e-sar na ho bū-e-libās-e-sandalī

sog meñ apne zaar ke yār-e-vafā-shi.ār ke

mehñdī chhūī na haath se missī na muddatoñ malī

hijr kī shab thī kyā ġhazab had ke sahe ġham-o-ta.ab

sub.h-e-visāl aa.ī ab jaan bachī balā Talī

koī nasīm-e-sub.h se merī taraf se ye kahe

bāġh-e-murād kī mire khil na sakī koī kalī

kyā tire haath aa gayā kab kā tujhe ġhubār thā

kū-e-sanam se kyuuñ sabā ḳhaak mirī uḌā chalī

dil hai bas ab alam se shaq yaas se rañg ruḳh hai faq

dekheñge ham kab ai 'qalaq' āñkhoñ se marqad-e-alī

ishq mein tere jaan-e-zar haif hai muft mein chali

tu ne par o sitam-shiar ab bhi meri KHabar na li

koi bala phir aaegi muft mein jaan jaegi

pech mein hum ko laegi zulf-e-siyah baDh chali

aate hi fasl-e-dil-pazir bole qafas mein ham-safir

jis mein hue the hum asir lo wahi phir hawa chali

ai gul-e-gulshan-e-wafa be-tire nind aae kya

bistar-e-KHar se siwa mujh ko hai farsh-e-maKHmali

KHwahish-e-justaju-e-yar had se bhi kuchh thi be-shumar

baad-e-fana mera ghubar DhunDh phira gali gali

danish-o-taqat-o-basar baDh gae sare ham-safar

zad-e-safar ki fikr kar lag rahi hai chala-chali

lao pyala-e-sharab ghir ke phir aaya hai sahab

ab nahin mere dil ko tab baad-e-bahaar phir chali

ai mah-e-asman-jah tujh sa nahin hai kaj-kulah

le ke falak charagh-e-mah DhunDh phira gali gali

mu-e-safed aa gaya dhabba KHizab ka laga

fasl-e-shaba-e-be-wafa dagh-e-firaq de chali

kabk ka dil hua figar mor ne jaan ki nisar

tegh-e-KHiram-e-naz-e-yar chaal nai nai chali

bhul ke koi dosto chahe na un hasinon ko

ab ye DhinDhora pher do lucknow mein gali gali

go thi ek aag mushtail ji tha par aisa muzmahil

sham-e-lahad bhi misl-e-dil gah bujhi kabhi jali

kahta hai shoKH-e-tund-KHu tab nahin dimagh ko

bais-e-dard-e-sar na ho bu-e-libas-e-sandali

sog mein apne zar ke yar-e-wafa-shiar ke

mehndi chhui na hath se missi na muddaton mali

hijr ki shab thi kya ghazab had ke sahe gham-o-tab

subh-e-visal aai ab jaan bachi bala Tali

koi nasim-e-subh se meri taraf se ye kahe

bagh-e-murad ki mere khil na saki koi kali

kya tere hath aa gaya kab ka tujhe ghubar tha

ku-e-sanam se kyun saba KHak meri uDa chali

dil hai bas ab alam se shaq yas se rang ruKH hai faq

dekhenge hum kab ai 'qalaq' aankhon se marqad-e-ali