ishq mein tha jo kabhi aaj wo eajaz kahan

ishq meñ thā jo kabhī aaj vo e.ajāz kahāñ

husn meñ pahlā sā vo naaz vo andāz kahāñ

zindagī ḳhaak ke ik Dher meñ tabdīl huī

kho ga.ī tā.ir-e-rangīñ tirī parvāz kahāñ

chāñd kī vādī-e-ḳhush-rang se jo aatī thī

aaj vo nuur meñ Duubī huī āvāz kahāñ

ek ik kar ke sabhī rauzan-o-dar band hue

dastakeñ duuñ maiñ kahāñ koī bhī dar baaz kahāñ

ret meñ ġharq huī mere junūñ kī kashtī

aaj sahrā ko bhī hāsil koī e.azāz kahāñ

sab bayāñ kar diyā āñkhoñ kī namī ne 'sāhil'

us se poshīda hai ab merā koī raaz kahāñ

ishq mein tha jo kabhi aaj wo eajaz kahan

husn mein pahla sa wo naz wo andaz kahan

zindagi KHak ke ek Dher mein tabdil hui

kho gai tair-e-rangin teri parwaz kahan

chand ki wadi-e-KHush-rang se jo aati thi

aaj wo nur mein Dubi hui aawaz kahan

ek ek kar ke sabhi rauzan-o-dar band hue

dastaken dun main kahan koi bhi dar baz kahan

ret mein gharq hui mere junun ki kashti

aaj sahra ko bhi hasil koi eazaz kahan

sab bayan kar diya aankhon ki nami ne 'sahil'

us se poshida hai ab mera koi raaz kahan