ishq mein tumko agar jo sadgi manzur hoti

'ishq meñ tum ko agar jo sādgī manzūr hotī

phir udāsī bhī mirī chehre pe jaise nuur hotī

tū agar detā dilāsa gher kar bāñhoñ meñ mujh ko

dard meñ hotī agar to bhī bahut masrūr hotī

phir nahīñ hotī kabhī duurī mohabbat meñ zarā bhī

do-jahāñ meñ is qadar dīvāngī mash.hūr hotī

ḳhaak hotī zindagī to ġham na hotā ek pal bhī

par mohabbat se bharī ye zindagī bharpūr hotī

tū na hotā bevafā to maiñ vafā dil se nibhātī

maiñ ḳhudā sā yaar pā kar 'ishq meñ maġhrūr hotī

jism se aage nikal kar 'ishq kartā ruuh se jo

Tuut kar qadmoñ meñ tere preyasī bhī chuur hotī

'ishq mein tum ko agar jo sadgi manzur hoti

phir udasi bhi meri chehre pe jaise nur hoti

tu agar deta dilasa gher kar banhon mein mujh ko

dard mein hoti agar to bhi bahut masrur hoti

phir nahin hoti kabhi duri mohabbat mein zara bhi

do-jahan mein is qadar diwangi mashhur hoti

KHak hoti zindagi to gham na hota ek pal bhi

par mohabbat se bhari ye zindagi bharpur hoti

tu na hota bewafa to main wafa dil se nibhati

main KHuda sa yar pa kar 'ishq mein maghrur hoti

jism se aage nikal kar 'ishq karta ruh se jo

Tut kar qadmon mein tere preyasi bhi chur hoti