ishq se aql ka fuqdan KHarida humne

'ishq se 'aql kā fuqdān ḳharīdā ham ne

aur vo bhī 'alal-ai'lān ḳharīdā ham ne

ham ne patthar bhī ḳharīdā to vo ā.īna thā

kabhī yāqūt na marjān ḳharīdā ham ne

bhūlne ke liye vo sā'at-e-paimān-e-alast

vaqt se ik nayā paimān ḳharīdā ham ne

shor uThThā thā ki nābūd huā hai koī

jab tire vasl kā armān ḳharīdā ham ne

kitne lamhāt ko apne liye dushvār kiyā

tab koī lamha-e-āsān ḳharīdā ham ne

band hone ko dukāñ hai to ḳhayāl aayā hai

fā.eda chhoḌ ke nuqsān ḳharīdā ham ne

fees bharne ke liye jeb meñ paise bhī na the

jin dinoñ 'mīr' kā dīvān ḳharīdā ham ne

'ishq se 'aql ka fuqdan KHarida hum ne

aur wo bhi 'alal-ai'lan KHarida hum ne

hum ne patthar bhi KHarida to wo aaina tha

kabhi yaqut na marjaan KHarida hum ne

bhulne ke liye wo sa'at-e-paiman-e-alast

waqt se ek naya paiman KHarida hum ne

shor uThTha tha ki nabud hua hai koi

jab tere wasl ka arman KHarida hum ne

kitne lamhat ko apne liye dushwar kiya

tab koi lamha-e-asan KHarida hum ne

band hone ko dukan hai to KHayal aaya hai

faeda chhoD ke nuqsan KHarida hum ne

fees bharne ke liye jeb mein paise bhi na the

jin dinon 'mir' ka diwan KHarida hum ne