mera dukh meri man ke dukh se thoDa muKHtalif hai

mirā dukh merī maañ ke dukh se thoḌā muḳhtalif hai

masā.il ek haiñ lekin zamāna muḳhtalif hai

sunā hai tīsrī duniyā meñ ausat 'umr kam hai

to un kā kātib-e-taqdīr goyā muḳhtalif hai

purāne peḌ manzar se haTātā jā rahā hai

ye mausam kis qadar saffāk kitnā muḳhtalif hai

tumhāre saath rishtoñ se bhī fursat pā ga.e ham

tumhāre baa'd apnoñ kā ravayya muḳhtalif hai

kabhī thiiñ khiḌkiyāñ rūmān-parvar jān-e-ālam

ye galiyāñ vo nahīñ haiñ ye darīcha muḳhtalif hai

naqāboñ ke udhar kyā hai ye 'uqda kaun khole

naqābeñ ek sī andar se chehra muḳhtalif hai

hamārī soch kā andāz hai auroñ se haT kar

hamārī shā'irī kā isti'āra muḳhtalif hai

mera dukh meri man ke dukh se thoDa muKHtalif hai

masail ek hain lekin zamana muKHtalif hai

suna hai tisri duniya mein ausat 'umr kam hai

to un ka katib-e-taqdir goya muKHtalif hai

purane peD manzar se haTata ja raha hai

ye mausam kis qadar saffak kitna muKHtalif hai

tumhaare sath rishton se bhi fursat pa gae hum

tumhaare ba'd apnon ka rawayya muKHtalif hai

kabhi thin khiDkiyan ruman-parwar jaan-e-alam

ye galiyan wo nahin hain ye daricha muKHtalif hai

naqabon ke udhar kya hai ye 'uqda kaun khole

naqaben ek si andar se chehra muKHtalif hai

hamari soch ka andaz hai auron se haT kar

hamari sha'iri ka isti'ara muKHtalif hai