isi bais to duniya ki musibat gham nahin hoti

isī baa.is to duniyā kī musībat ġham nahīñ hotī

ye duniyā ġham to detī hai sharīk-e-ġham nahīñ hotī

charāġhoñ meñ lahū insāniyat kā jagmagātā hai

magar insāniyat kī chashm-e-kam pur-nam nahīñ hotī

ḳhushī mahsūs kartā huuñ to duniyā saath detī hai

musībat meñ magar āmāda-e-mātam nahīñ hotī

ḳhushī kī sham.a to ai dost zad meñ aa bhī jaatī hai

magar dāġh-e-jigar kī raushnī maddham nahīñ hotī

salīqa chāhiye āvāz ko pahchān lene kā

navā-e-shā.irī har dam navā-e-ġham nahīñ hotī

'jalīl' un se bichhaḌ kar ik zamāna ho gayā lekin

abhī tak mere ashkoñ kī ravānī kam nahīñ hotī

isi bais to duniya ki musibat gham nahin hoti

ye duniya gham to deti hai sharik-e-gham nahin hoti

charaghon mein lahu insaniyat ka jagmagata hai

magar insaniyat ki chashm-e-kam pur-nam nahin hoti

KHushi mahsus karta hun to duniya sath deti hai

musibat mein magar aamada-e-matam nahin hoti

KHushi ki shama to ai dost zad mein aa bhi jati hai

magar dagh-e-jigar ki raushni maddham nahin hoti

saliqa chahiye aawaz ko pahchan lene ka

nawa-e-shairi har dam nawa-e-gham nahin hoti

'jalil' un se bichhaD kar ek zamana ho gaya lekin

abhi tak mere ashkon ki rawani kam nahin hoti