isi liye to ujalon se dosti hui hai

isī liye to ujāloñ se dostī huī hai

ki tere aañkh jhapakne se raushnī huī hai

zarūr ishq kī hiddat se ye namī huī hai

ki ghaas aap ke chalne se reshmī huī hai

hameñ yaqīn hai is baaġh ke nahīñ ho tum

ki ham ne chiḌiyoñ kī ta.adād tak ginī huī hai

usī kā haq hai ki dīvān us ke naam karūñ

vo jis kī yaad meñ din raat shā.irī huī hai

maiñ ek nuqte pe markūz ho gayā huuñ tabhī

zamīn ghuum rahī thī par ab thamī huī hai

vo ham-mizāj the lekin kabhī qarīb na the

qarīb ho ga.e haiñ jab se dushmanī huī hai

ye log yūñhī ġhizāoñ ko dosh dete haiñ

hamāre ḳhuuñ meñ mohabbat kī bas kamī huī hai

zarā sī der meñ dāman kā haal dekheñge

abhī babūl ke kāñToñ se dostī huī hai

tumhārī aañkh kā kājal bikhar gayā hai kahīñ

tabhī to shaam achānak se surma.ī huī hai

samajh chukā huuñ maiñ lahje kī silvaTeñ 'adnān'

so jāntā huuñ mulāqāt āḳhrī huī hai

isi liye to ujalon se dosti hui hai

ki tere aankh jhapakne se raushni hui hai

zarur ishq ki hiddat se ye nami hui hai

ki ghas aap ke chalne se reshmi hui hai

hamein yaqin hai is bagh ke nahin ho tum

ki hum ne chiDiyon ki tadad tak gini hui hai

usi ka haq hai ki diwan us ke nam karun

wo jis ki yaad mein din raat shairi hui hai

main ek nuqte pe markuz ho gaya hun tabhi

zamin ghum rahi thi par ab thami hui hai

wo ham-mizaj the lekin kabhi qarib na the

qarib ho gae hain jab se dushmani hui hai

ye log yunhi ghizaon ko dosh dete hain

hamare KHun mein mohabbat ki bas kami hui hai

zara si der mein daman ka haal dekhenge

abhi babul ke kanTon se dosti hui hai

tumhaari aankh ka kajal bikhar gaya hai kahin

tabhi to sham achanak se surmai hui hai

samajh chuka hun main lahje ki silwaTen 'adnan'

so jaanta hun mulaqat aaKHri hui hai