isi sabab nahin khulti meri zaban logo

isī sabab nahīñ khultī mirī zabāñ logo

na sun sakoge kabhī dil kī dāstāñ logo

vo kaun hai jise dil se lagā ke pyaar kareñ

shu.ūr-e-zauq-e-mohabbat rahā kahāñ logo

tumhāre rahbar-e-manzil qarīb hī hoñge

zarā talāsh karo apne darmiyāñ logo

ab apne apne nasheman kā hai ḳhudā-hāfiz

chamak rahī haiñ zamāne meñ bijliyāñ logo

chalo ki dasht meñ kāñToñ se dil ko bahlā leñ

maqām-e-amn nahīñ sehn-e-gulsitāñ logo

hamesha rahzan-o-rahbar ke farq ko jaano

vagarna koshish-e-manzil hai rā.egāñ logo

mire junūn-e-mohabbat kī dāstāneñ haiñ

ye chand chāk-e-garebāñ kī dhajjiyāñ logo

asīr-e-dard giraftār-e-ġham magar fankār

tumhāre shahr meñ hai 'tāj' naġhma-ḳhvāñ logo

isi sabab nahin khulti meri zaban logo

na sun sakoge kabhi dil ki dastan logo

wo kaun hai jise dil se laga ke pyar karen

shuur-e-zauq-e-mohabbat raha kahan logo

tumhaare rahbar-e-manzil qarib hi honge

zara talash karo apne darmiyan logo

ab apne apne nasheman ka hai KHuda-hafiz

chamak rahi hain zamane mein bijliyan logo

chalo ki dasht mein kanTon se dil ko bahla len

maqam-e-amn nahin sehn-e-gulsitan logo

hamesha rahzan-o-rahbar ke farq ko jaano

wagarna koshish-e-manzil hai raegan logo

mere junun-e-mohabbat ki dastanen hain

ye chand chaak-e-gareban ki dhajjiyan logo

asir-e-dard giraftar-e-gham magar fankar

tumhaare shahr mein hai 'taj' naghma-KHwan logo