isi sabab se KHizan hum ko nagawar nahin

isī sabab se ḳhizāñ ham ko nāgavār nahīñ

bahār bhī to hamāre liye bahār nahīñ

havas kī dhuup meñ tapte haiñ ġhuncha-e-nauras

chaman meñ koī shajar aaj sāya-dār nahīñ

na jaane kyā hue ham-rāhiyān-e-manzil-e-shauq

hamārī hadd-e-nazar tak koī ġhubār nahīñ

junūn-e-ishq ke anjām kī ḳhabar kyā ho

abhī to apnā garebāñ bhī tār-tār nahīñ

ḳhulūs uTh gayā kuchh is tarah zamāne se

ki jin pe naaz thā ab vo bhī ġham-gusār nahīñ

ye dard-o-ranj-o-alam kam haiñ kyā qayāmat se

hameñ mazīd qayāmat kā intizār nahīñ

hameñ tū aaj hī āzād kar de ai sayyād

ki ab hameñ tire vā'doñ pe e'tibār nahīñ

guzār leñge yūñhī apnī zindagī 'sābir'

kisī ke lutf-o-karam par hī inhisār nahīñ

isi sabab se KHizan hum ko nagawar nahin

bahaar bhi to hamare liye bahaar nahin

hawas ki dhup mein tapte hain ghuncha-e-nauras

chaman mein koi shajar aaj saya-dar nahin

na jaane kya hue ham-rahiyan-e-manzil-e-shauq

hamari hadd-e-nazar tak koi ghubar nahin

junun-e-ishq ke anjam ki KHabar kya ho

abhi to apna gareban bhi tar-tar nahin

KHulus uTh gaya kuchh is tarah zamane se

ki jin pe naz tha ab wo bhi gham-gusar nahin

ye dard-o-ranj-o-alam kam hain kya qayamat se

hamein mazid qayamat ka intizar nahin

hamein tu aaj hi aazad kar de ai sayyaad

ki ab hamein tere wa'don pe e'tibar nahin

guzar lenge yunhi apni zindagi 'sabir'

kisi ke lutf-o-karam par hi inhisar nahin