isi zamin pe nachaar lauT kar aae

isī zamīn pe nāchār lauT kar aa.e

jo āsmān se ūñchī uḌaan bhar aa.e

hai mere ḳhuun meñ shāmil mirā sagā bhaa.ī

mujhe hai ḳhauf na ilzām mere sar aa.e

ye dostoñ kī navāzish hai ek bār-e-garāñ

baḌe ḳhulūs se dushman kā kaam kar aa.e

samajh ga.e vo nasheb-o-farāz ke asrār

buland koh kī choTī se jo utar aa.e

baḌī 'ajīb tavaqqo' hai merī dushman se

agar maiñ ro.uuñ to us kī bhī aañkh bhar aa.e

nidā-e-vaqt ḳhabar-dār kar ga.ī mujh ko

ga.e jo koh-e-nidā par vo be-ḳhabar aa.e

uThā ke haath ye mausam ne bad-du'ā dī hai

ki ab ke fasl jo aa.e vo be-samar aa.e

laraz uThī thī ik 'ifrīt se guzishta sadī

'ajīb shakl banā.e hue sifar aa.e

na jaane kaunsā rishta hai ye tabāhī kā

ki hādsāt palaT kar hamāre ghar aa.e

ye koī 'aib hai yā intihā mohabbat kī

ki aa.ine meñ mujhe 'aks do nazar aa.e

isi zamin pe nachaar lauT kar aae

jo aasman se unchi uDan bhar aae

hai mere KHun mein shamil mera saga bhai

mujhe hai KHauf na ilzam mere sar aae

ye doston ki nawazish hai ek bar-e-garan

baDe KHulus se dushman ka kaam kar aae

samajh gae wo nasheb-o-faraaz ke asrar

buland koh ki choTi se jo utar aae

baDi 'ajib tawaqqo' hai meri dushman se

agar main roun to us ki bhi aankh bhar aae

nida-e-waqt KHabar-dar kar gai mujh ko

gae jo koh-e-nida par wo be-KHabar aae

uTha ke hath ye mausam ne bad-du'a di hai

ki ab ke fasl jo aae wo be-samar aae

laraz uThi thi ek 'ifrit se guzishta sadi

'ajib shakl banae hue sifar aae

na jaane kaunsa rishta hai ye tabahi ka

ki hadsat palaT kar hamare ghar aae

ye koi 'aib hai ya intiha mohabbat ki

ki aaine mein mujhe 'aks do nazar aae