itna hi nahin hai ki tere bin na raha jae

itnā hī nahīñ hai ki tire bin na rahā jaa.e

vo jaañ pe banī hai ki jiye bin na rahā jaa.e

ab dastaras-e-shauq hai bas naam tak us ke

aksar jise sau tarah likhe bin na rahā jaa.e

ġham-burda sahī ġhuncha-e-afsurda sahī dil

tum pyaar se dekho to khile bin na rahā jaa.e

hai dil hī vo nādāñ ki ho tadbīr se naumīd

aur phir koī tadbīr kiye bin na rahā jaa.e

uftād meñ kuchh sa'ī-e-matānat nahīñ chaltī

rone ko jo rokeñ to hañse bin na rahā jaa.e

ham vo haiñ ki sad-ka.aba o sad-dair ke hote

gosha koī ta.amīr kiye bin na rahā jaa.e

kuchh der guzartī hai ki ai bulbul-e-nāshād

sayyād se naḳhchīr hue bin na rahā jaa.e

har chand ki furqat meñ tirī zahr ho jiinā

kuchh qahr hai aisā ki jiye bin na rahā jaa.e

itna hi nahin hai ki tere bin na raha jae

wo jaan pe bani hai ki jiye bin na raha jae

ab dastaras-e-shauq hai bas nam tak us ke

aksar jise sau tarah likhe bin na raha jae

gham-burda sahi ghuncha-e-afsurda sahi dil

tum pyar se dekho to khile bin na raha jae

hai dil hi wo nadan ki ho tadbir se naumid

aur phir koi tadbir kiye bin na raha jae

uftad mein kuchh sa'i-e-matanat nahin chalti

rone ko jo roken to hanse bin na raha jae

hum wo hain ki sad-kaba o sad-dair ke hote

gosha koi tamir kiye bin na raha jae

kuchh der guzarti hai ki ai bulbul-e-nashad

sayyaad se naKHchir hue bin na raha jae

har chand ki furqat mein teri zahr ho jina

kuchh qahr hai aisa ki jiye bin na raha jae