itna na ghum raat ko phulon ki bas mein

itnā na ghuum raat ko phūloñ kī baas meñ

so.e paḌe haiñ chāroñ taraf saañp ghaas meñ

har samt us ne ātishī shīshe lagā diye

saḌkoñ pe log aa.e the kaale libās meñ

gardish meñ zindagī rahī afvāh kī tarah

umreñ guzār dī ga.iiñ ḳhauf-o-hirās meñ

aglā nisāb nūr-e-basīrat se paḌh liyā

āñkheñ to chhoḌ aa.e the pahlī class meñ

ye aur baat zer-e-zamīñ dafn ho ga.iiñ

varna jaḌoñ kā ḳhuun hai phal kī miThās meñ

ab baar baar us kī taraf dekhte ho kyā

ab sirf merī tishna-labī hai gilās meñ

manzar kisī tilism kī zad meñ na ho 'nasīm'

sarsoñ kā rañg dauḌ rahā hai kapās meñ

itna na ghum raat ko phulon ki bas mein

soe paDe hain chaaron taraf sanp ghas mein

har samt us ne aatishi shishe laga diye

saDkon pe log aae the kale libas mein

gardish mein zindagi rahi afwah ki tarah

umren guzar di gain KHauf-o-hiras mein

agla nisab nur-e-basirat se paDh liya

aankhen to chhoD aae the pahli class mein

ye aur baat zer-e-zamin dafn ho gain

warna jaDon ka KHun hai phal ki miThas mein

ab bar bar us ki taraf dekhte ho kya

ab sirf meri tishna-labi hai gilas mein

manzar kisi tilism ki zad mein na ho 'nasim'

sarson ka rang dauD raha hai kapas mein