itni hawa na waiz-e-din-dar bandhiye

itnī havā na vā.iz-e-dīñ-dār bāñdhiye

izzat sañbāliye sar-e-dastār bāñdhiye

gum kījiye havās ko tafsīr-e-hosh meñ

dānish ko jahl jahl ko pindār bāñdhiye

mahrūm-e-hosh soiye par diije dād-e-hosh

gul ko giyāh dasht ko gulzār bāñdhiye

bū chhīniye guloñ se ki dete haiñ zauq-e-fan

yuuñ ḳhush-navā tuyūr kī chahkār bāñdhiye

ab juz havā nahīñ hai girah meñ hamārī ḳhaak

sau baar kholiye use sau baar bāñdhiye

bhaḌkī hai aag 'arsh' ḳhayābān-e-bazm meñ

hadd-e-jalāl-e-sho.ala-e-guftār bāñdhiye

itni hawa na waiz-e-din-dar bandhiye

izzat sanbaaliye sar-e-dastar bandhiye

gum kijiye hawas ko tafsir-e-hosh mein

danish ko jahl jahl ko pindar bandhiye

mahrum-e-hosh soiye par dije dad-e-hosh

gul ko giyah dasht ko gulzar bandhiye

bu chhiniye gulon se ki dete hain zauq-e-fan

yun KHush-nawa tuyur ki chahkar bandhiye

ab juz hawa nahin hai girah mein hamari KHak

sau bar kholiye use sau bar bandhiye

bhaDki hai aag 'arsh' KHayaban-e-bazm mein

hadd-e-jalal-e-shoala-e-guftar bandhiye