itni KHushbu to mulaqat mein rahne dije

itnī ḳhushbū to mulāqāt meñ rahne diije

apnī pahchān mirī zaat meñ rahne diije

shahr meñ aur na.e zaḳhm na ugne paa.eñ

shāhzādoñ ko havālāt meñ rahne diije

sar chalā jaa.e ye dastār na jaane paa.e

itnā tevar to rivāyāt meñ rahne diije

kal kī TuuTī huī dīvār ke kaam ā.eñgī

jitnī īñTeñ haiñ hisābāt meñ rahne diije

kab ye kahtā huuñ ki maiñ koī valī-zāda huuñ

ḳhāksārī hī karāmāt meñ rahne diije

aap ke shahr meñ sūraj to nikalne se rahā

ek mash.al hī mire haat meñ rahne diije

aag aur phuul kī pahchān nahīñ jis ko 'riyāz'

aise insān ko ḳhatrāt meñ rahne diije

itni KHushbu to mulaqat mein rahne dije

apni pahchan meri zat mein rahne dije

shahr mein aur nae zaKHm na ugne paen

shahzadon ko hawalat mein rahne dije

sar chala jae ye dastar na jaane pae

itna tewar to riwayat mein rahne dije

kal ki TuTi hui diwar ke kaam aaengi

jitni inTen hain hisabaat mein rahne dije

kab ye kahta hun ki main koi wali-zada hun

KHaksari hi karamat mein rahne dije

aap ke shahr mein suraj to nikalne se raha

ek mashal hi mere hat mein rahne dije

aag aur phul ki pahchan nahin jis ko 'riyaz'

aise insan ko KHatraat mein rahne dije