ja chhupi hai kahan guphaon mein

jā chhupī hai kahāñ guphāoñ meñ

ai ḳhushī ab jhalak adāoñ meñ

zindagī bojh bantī jaatī hai

kuchh to tarmīm kar sazāoñ meñ

ik nazar to palaT ke dekh zarā

maiñ bhī huuñ terī āshnāoñ meñ

shahr kā shahr yuuñ divāna nahīñ

baat kuchh to hai in adāoñ meñ

diid se hī ilaaj mumkin hai

zahr hī zahr hai davāoñ meñ

ziist kī har tapish meñ jaltī rahī

yaar baiThe rahe havāoñ meñ

ai hayāt is-qadar na mushkil ho

ḳhauf ho terī dhuup chhāñv meñ

mujh ko taslīm hai jafā terī

hai 'aqīdat mirī vafāoñ meñ

mujh ko mujh se churāne vaale sun

tū hai shāmil mirī duāoñ meñ

āsmāñ maiñ bhī chhū hī saktī thī

beḌiyāñ haiñ anek paañv meñ

zikr ab to karo mohabbat kā

kitnī nafrat hai in fazāoñ meñ

raat bhar jāgte haiñ bachche bhī

ab nahīñ farq shahr gaañv meñ

bas pasīne nasīb meñ aa.e

zindagī terī dhuup chhāñv meñ

vaqt ke maare tanhā tum hī nahīñ

maiñ bhī shāmil huuñ mubtalāon meñ

zindagī aur kitnā chalnā hai

aable paḌ ga.e haiñ paañv meñ

ja chhupi hai kahan guphaon mein

ai KHushi ab jhalak adaon mein

zindagi bojh banti jati hai

kuchh to tarmim kar sazaon mein

ek nazar to palaT ke dekh zara

main bhi hun teri aashnaon mein

shahr ka shahr yun diwana nahin

baat kuchh to hai in adaon mein

did se hi ilaj mumkin hai

zahr hi zahr hai dawaon mein

zist ki har tapish mein jalti rahi

yar baiThe rahe hawaon mein

ai hayat is-qadar na mushkil ho

KHauf ho teri dhup chhanw mein

mujh ko taslim hai jafa teri

hai 'aqidat meri wafaon mein

mujh ko mujh se churane wale sun

tu hai shamil meri duaon mein

aasman main bhi chhu hi sakti thi

beDiyan hain anek panw mein

zikr ab to karo mohabbat ka

kitni nafrat hai in fazaon mein

raat bhar jagte hain bachche bhi

ab nahin farq shahr ganw mein

bas pasine nasib mein aae

zindagi teri dhup chhanw mein

waqt ke mare tanha tum hi nahin

main bhi shamil hun mubtalaon mein

zindagi aur kitna chalna hai

aable paD gae hain panw mein