ja nahin sakti jidhar jaane ko ji chahta hai

jā nahīñ saktī jidhar jaane ko jī chāhtā hai

in dinoñ yuuñ hai ki mar jaane ko jī chāhtā hai

ghar meñ rahtī huuñ to bāhar kī havā khīñchtī hai

ghar se jab niklūñ to ghar jaane ko jī chāhtā hai

maiñ ne kab bāñdh ke rakhā hai tumheñ pallū se

tum chale jaao agar jaane ko jī chāhtā hai

ahd to thā ki na toḌūngī maiñ hadd-e-fāsil

aaj va.ade se mukar jaane ko jī chāhtā hai

terī āñkhoñ meñ to rahte hue ik umr huī

ab tire dil meñ utar jaane ko jī chāhtā hai

muddatoñ baad tirā qurb milā hai mujh ko

aaj har had se guzar jaane ko jī chāhtā hai

barq-raftār guzartī huuñ vahīñ se 'raḳhshāñ'

jis jagah merā Thahar jaane ko jī chāhtā hai

ja nahin sakti jidhar jaane ko ji chahta hai

in dinon yun hai ki mar jaane ko ji chahta hai

ghar mein rahti hun to bahar ki hawa khinchti hai

ghar se jab niklun to ghar jaane ko ji chahta hai

main ne kab bandh ke rakha hai tumhein pallu se

tum chale jao agar jaane ko ji chahta hai

ahd to tha ki na toDungi main hadd-e-fasil

aaj wade se mukar jaane ko ji chahta hai

teri aankhon mein to rahte hue ek umr hui

ab tere dil mein utar jaane ko ji chahta hai

muddaton baad tera qurb mila hai mujh ko

aaj har had se guzar jaane ko ji chahta hai

barq-raftar guzarti hun wahin se 'raKHshan'

jis jagah mera Thahar jaane ko ji chahta hai