jada hai ishq zist safar hai chale chalen

jaada hai ishq ziist safar hai chale chaleñ

jab tak mile na jalva-e-manzil baḌhe chaleñ

vo razm-gāh-e-zīst ho yā kū-e-yār ho

ab koī rahguzār bhī ho jhūmte chaleñ

kyā log the jo rāh-e-junūñ se guzar ga.e

jī chāhtā hai naqsh-e-qadam chūmte chaleñ

ik umr ġham kī dhuup meñ chalnā hai do-ghaḌī

in gesuoñ kī chhāñv meñ bhī baiThte chaleñ

hogā kabhī na ḳhatm ye afsāna-e-hayāt

jab tak haiñ zindagī kā fasāna kahe chaleñ

phailā.eñ zindagī kā ujālā har ek sū

ban kar charāġh-e-shahr-e-mohabbat jale chaleñ

āvāz de sabā ki pukārā kare bahār

har rahguzar meñ phuul khilāte chale chaleñ

sāhil to mil hī jā.egā sāhil kī fikr kyā

ik mauj-e-zindagī ke sahāre bahe chaleñ

guzreñge rahravān-e-mohabbat abhī 'payām'

har raah meñ charāġh jalāte chale chaleñ

jada hai ishq zist safar hai chale chalen

jab tak mile na jalwa-e-manzil baDhe chalen

wo razm-gah-e-zist ho ya ku-e-yar ho

ab koi rahguzar bhi ho jhumte chalen

kya log the jo rah-e-junun se guzar gae

ji chahta hai naqsh-e-qadam chumte chalen

ek umr gham ki dhup mein chalna hai do-ghaDi

in gesuon ki chhanw mein bhi baiThte chalen

hoga kabhi na KHatm ye afsana-e-hayat

jab tak hain zindagi ka fasana kahe chalen

phailaen zindagi ka ujala har ek su

ban kar charagh-e-shahr-e-mohabbat jale chalen

aawaz de saba ki pukara kare bahaar

har rahguzar mein phul khilate chale chalen

sahil to mil hi jaega sahil ki fikr kya

ek mauj-e-zindagi ke sahaare bahe chalen

guzrenge rahrawan-e-mohabbat abhi 'payam'

har rah mein charagh jalate chale chalen