jae aashiq ki bala hashr mein kya rakkha hai

jaa.e āshiq kī balā hashr meñ kyā rakkhā hai

ek fitna tirī Thokar kā uThā rakkhā hai

lutf-e-kaunain hai is meñ mirī botal kī piyo

zāhido chashma-e-tasnīm meñ kyā rakkhā hai

mil hī jaatā hai koī chheḌne vaalā mujh ko

tum alag ho to mujhe dil ne satā rakkhā hai

kal vo fitna bhī qayāmat meñ qayāmat hogā

jis ko aaj aap ne qadmoñ se lagā rakkhā hai

aa.e mayyat pe kis andāz se farmāte haiñ

dam mire chheḌne ko us ne churā rakkhā hai

dil uḌe jaate haiñ har fitna-e-āvāz ke saath

baiTh kar pardoñ meñ ik hashr uThā rakkhā hai

ḳhush rahoge jo piyo baada faqīrī meñ 'vasīm'

mujh ko ik mast ne ye bhed batā rakkhā hai

jae aashiq ki bala hashr mein kya rakkha hai

ek fitna teri Thokar ka uTha rakkha hai

lutf-e-kaunain hai is mein meri botal ki piyo

zahido chashma-e-tasnim mein kya rakkha hai

mil hi jata hai koi chheDne wala mujh ko

tum alag ho to mujhe dil ne sata rakkha hai

kal wo fitna bhi qayamat mein qayamat hoga

jis ko aaj aap ne qadmon se laga rakkha hai

aae mayyat pe kis andaz se farmate hain

dam mere chheDne ko us ne chura rakkha hai

dil uDe jate hain har fitna-e-awaz ke sath

baiTh kar pardon mein ek hashr uTha rakkha hai

KHush rahoge jo piyo baada faqiri mein 'wasim'

mujh ko ek mast ne ye bhed bata rakkha hai