jagti aankhon mein kaise KHwab dar aane lage

jāgtī āñkhoñ meñ kaise ḳhvāb dar aane lage

rāste merī taraf le kar safar aane lage

duur tak uḌtī abābīloñ kī Dāreñ dekh kar

ūñghte panchhī ke bhī jumbish meñ par aane lage

kā.enāt-e-shab meñ chashm-e-justujū bhaTkī phirī

raushnī ke mantaqe āḳhir nazar aane lage

kitnī dard-añgez thī suunī manDiyoñ kī pukār

uḌ ga.e the jo parinde lauT kar aane lage

ghar to ik din ham ne bhī chhoḌā siddhārth kī tarah

phuul āñgan ke magar har sū nazar aane lage

dhajjiyāñ dāman kī pahle hī numāyāñ thiiñ bahut

kuchh na.e ilzām bhī ab mere sar aane lage

jagti aankhon mein kaise KHwab dar aane lage

raste meri taraf le kar safar aane lage

dur tak uDti ababilon ki Daren dekh kar

unghte panchhi ke bhi jumbish mein par aane lage

kaenat-e-shab mein chashm-e-justuju bhaTki phiri

raushni ke mantaqe aaKHir nazar aane lage

kitni dard-angez thi suni manDiyon ki pukar

uD gae the jo parinde lauT kar aane lage

ghar to ek din hum ne bhi chhoDa siddhaarth ki tarah

phul aangan ke magar har su nazar aane lage

dhajjiyan daman ki pahle hi numayan thin bahut

kuchh nae ilzam bhi ab mere sar aane lage