jahil ko agar jehl ka inam diya jae

jāhil ko agar jehl kā in.aam diyā jaa.e

is hādisa-e-vaqt ko kyā naam diyā jaa.e

maiḳhāne kī tauhīn hai rindoñ kī hatak hai

kam-zarf ke hāthoñ meñ agar jaam diyā jaa.e

hai ḳhū-e-ayāzī hī sazāvār-e-malāmat

mahmūd ko kyuuñ ta.ana-e-ikrām diyā jaa.e

zid hai ki unheñ maan ke sarḳhīl-e-bahārāñ

ġhunchoñ kī taraf se koī paiġhām diyā jaa.e

ham maslahat-e-vaqt ke qaa.il nahīñ yaaro

ilzām jo denā hai sar-e-ām diyā jaa.e

behtar hai ki is bazm se uTh aa.iye 'mohsin'

sarqe ko jahāñ rutba-e-ilhām diyā jaa.e

jahil ko agar jehl ka inam diya jae

is hadisa-e-waqt ko kya nam diya jae

maiKHane ki tauhin hai rindon ki hatak hai

kam-zarf ke hathon mein agar jam diya jae

hai KHu-e-ayazi hi sazawar-e-malamat

mahmud ko kyun tana-e-ikram diya jae

zid hai ki unhen man ke sarKHil-e-bahaaran

ghunchon ki taraf se koi paigham diya jae

hum maslahat-e-waqt ke qail nahin yaro

ilzam jo dena hai sar-e-am diya jae

behtar hai ki is bazm se uTh aaiye 'mohsin'

sarqe ko jahan rutba-e-ilham diya jae