jam-e-tahi lahraya humne

jām-e-tahī lahrāyā ham ne

kaisā jashn manāyā ham ne

raat havā ke saath nikal kar

halqa-e-dar khaḌkāyā ham ne

chup galiyoñ meñ diiñ āvāzeñ

shahr meñ shor machāyā ham ne

ḳhaak the lekin lahar meñ aa kar

raqs-e-junūñ farmāyā ham ne

dekheñ kab hoñ ishq meñ kundan

raakh to kar dī kaayā ham ne

umr-e-sharar bekār na guzrī

pal bhar to chamkāyā ham ne

sab ko nishāna karte karte

ḳhud ko maar girāyā ham ne

tum se mile to ḳhud se ziyāda

tum ko akelā paayā ham ne

apne sar kī aan pe vaarī

paañv se lipTī maayā ham ne

ai shab-e-hijrāñ ab to ijāzat

itnā saath nibhāyā ham ne

jam-e-tahi lahraya hum ne

kaisa jashn manaya hum ne

raat hawa ke sath nikal kar

halqa-e-dar khaDkaya hum ne

chup galiyon mein din aawazen

shahr mein shor machaya hum ne

KHak the lekin lahar mein aa kar

raqs-e-junun farmaya hum ne

dekhen kab hon ishq mein kundan

rakh to kar di kaya hum ne

umr-e-sharar bekar na guzri

pal bhar to chamkaya hum ne

sab ko nishana karte karte

KHud ko mar giraya hum ne

tum se mile to KHud se ziyaada

tum ko akela paya hum ne

apne sar ki aan pe wari

panw se lipTi maya hum ne

ai shab-e-hijran ab to ijazat

itna sath nibhaya hum ne