jaan-ba-lab hasrat-o-arman pe rona aaya

jāñ-ba-lab hasrat-o-armān pe ronā aayā

mehrbāñ aap ke ehsān pe ronā aayā

ḳhāna-e-be-sar-o-sāmān pe ronā aayā

ghar meñ aa.e hue mehmān pe ronā aayā

phuul bhī dāman-e-fitrat meñ the angāre bhī

aañkh vaale tirī pahchān pe ronā aayā

ghar ke luTne kā mujhe ġham nahīñ lekin ai dost

kotah-andesh nigahbān pe ronā aayā

bāda-e-nāb kī aur apne ḳhumistāñ meñ kamī

pīr-e-mai-ḳhāna ke elaan pe ronā aayā

kis ke ghar jā.egā sailāb-e-balā mere ba.ad

duur tak soch ke tūfān pe ronā aayā

sust-raftāri-e-ushtur to koī baat nahīñ

past-āhañg-e-hudī-ḳhvān pe ronā aayā

dair se rabt haram se bhī ta.alluq kyā ḳhuub

is lachakte hue īmān pe ronā aayā

iltifāt-e-nigah-e-nāz mire dost bajā

apnī barbādī ke imkān pe ronā aayā

dushman-e-tauba ghaTāoñ kā gila kyā 'fārūq'

Dagmagāte hue īmān pe ronā aayā

jaan-ba-lab hasrat-o-arman pe rona aaya

mehrban aap ke ehsan pe rona aaya

KHana-e-be-sar-o-saman pe rona aaya

ghar mein aae hue mehman pe rona aaya

phul bhi daman-e-fitrat mein the angare bhi

aankh wale teri pahchan pe rona aaya

ghar ke luTne ka mujhe gham nahin lekin ai dost

kotah-andesh nigahban pe rona aaya

baada-e-nab ki aur apne KHumistan mein kami

pir-e-mai-KHana ke elan pe rona aaya

kis ke ghar jaega sailab-e-bala mere baad

dur tak soch ke tufan pe rona aaya

sust-raftari-e-ushtur to koi baat nahin

past-ahang-e-hudi-KHwan pe rona aaya

dair se rabt haram se bhi talluq kya KHub

is lachakte hue iman pe rona aaya

iltifat-e-nigah-e-naz mere dost baja

apni barbaadi ke imkan pe rona aaya

dushman-e-tauba ghaTaon ka gila kya 'faruq'

Dagmagate hue iman pe rona aaya