jaan-e-gulshan jo hue wo gul-e-tar dekhe hain

jān-e-gulshan jo hue vo gul-e-tar dekhe haiñ

ham ne mausam ke hasīñ rang kidhar dekhe haiñ

tum se milte haiñ jo ham un kī tasallī ke liye

varna aise to bahut shām-o-sahar dekhe haiñ

ālam-e-be-sar-o-sāmāñ nahīñ guzrā tum par

tum ne kab aag meñ jalte hue ghar dekhe haiñ

hākim-e-vaqt diloñ par thī hukūmat un kī

ham ne aise bhī ka.ī ḳhāk-basar dekhe haiñ

apne hāthoñ hī miTā dete haiñ ḳhud apnā nishāñ

aise insān nahīñ dekhe magar dekhe haiñ

in galī-kūchoñ pe ye vaqt bhī aayā 'manzar'

shahr vāloñ ke badan ḳhuun meñ tar dekhe haiñ

jaan-e-gulshan jo hue wo gul-e-tar dekhe hain

hum ne mausam ke hasin rang kidhar dekhe hain

tum se milte hain jo hum un ki tasalli ke liye

warna aise to bahut sham-o-sahar dekhe hain

aalam-e-be-sar-o-saman nahin guzra tum par

tum ne kab aag mein jalte hue ghar dekhe hain

hakim-e-waqt dilon par thi hukumat un ki

hum ne aise bhi kai KHak-basar dekhe hain

apne hathon hi miTa dete hain KHud apna nishan

aise insan nahin dekhe magar dekhe hain

in gali-kuchon pe ye waqt bhi aaya 'manzar'

shahr walon ke badan KHun mein tar dekhe hain