jaan ganwaun ki sar bacha lun main

jaañ gañvā.ūñ ki sar bachā luuñ maiñ

koī talvār to uThā luuñ maiñ

tum ne furqat kī shab guzārī hai

kyoñ na vahshat kā din manā luuñ maiñ

ho ijāzat to bazm-e-girya meñ

ġham hañsūñ dard gungunā luuñ maiñ

ek sūrat mujhe banānī hai

ek sūrat agar miTā luuñ maiñ

bhuuk le aa.egī parindoñ ko

pheñk duuñ jaal yā uThā luuñ maiñ

ek āvāz hī lagānī hai

ek āvāz phir lagā luuñ maiñ

raat bezār hai to kyoñ na 'zamān'

dil jalā luuñ diyā bujhā luuñ maiñ

jaan ganwaun ki sar bacha lun main

koi talwar to uTha lun main

tum ne furqat ki shab guzari hai

kyon na wahshat ka din mana lun main

ho ijazat to bazm-e-girya mein

gham hansun dard gunguna lun main

ek surat mujhe banani hai

ek surat agar miTa lun main

bhuk le aaegi parindon ko

phenk dun jal ya uTha lun main

ek aawaz hi lagani hai

ek aawaz phir laga lun main

raat bezar hai to kyon na 'zaman'

dil jala lun diya bujha lun main