jaan jab tak fida nahin hoti

jaan jab tak fidā nahīñ hotī

puurī rasm-e-vafā nahīñ hotī

shīsha TuuTe to hotī hai āvāz

dil jo TuuTe sadā nahīñ hotī

banda-parvar hijāb lāzim hai

har nazar pārsā nahīñ hotī

bevafā se na rakh vafā kī aas

bevafā se vafā nahīñ hotī

jab se us but pe aa gayā hai dil

ham se yād-e-ḳhudā nahīñ hotī

āshiqī kī namāz ai zāhid

āshiqoñ se qazā nahīñ hotī

aap nazdīk jab nahīñ hote

duur ġham kī balā nahīñ hotī

ho na jab tak ḳhulūs dil ke saath

iltijā iltijā nahīñ hotī

kuchh bhī hotā nahīñ kabhī 'purnam'

jab tak us kī razā nahīñ hotī

jaan jab tak fida nahin hoti

puri rasm-e-wafa nahin hoti

shisha TuTe to hoti hai aawaz

dil jo TuTe sada nahin hoti

banda-parwar hijab lazim hai

har nazar parsa nahin hoti

bewafa se na rakh wafa ki aas

bewafa se wafa nahin hoti

jab se us but pe aa gaya hai dil

hum se yaad-e-KHuda nahin hoti

aashiqi ki namaz ai zahid

aashiqon se qaza nahin hoti

aap nazdik jab nahin hote

dur gham ki bala nahin hoti

ho na jab tak KHulus dil ke sath

iltija iltija nahin hoti

kuchh bhi hota nahin kabhi 'purnam'

jab tak us ki raza nahin hoti