jaan kabhi din se kabhi raat se Takraati hai

jaañ kabhī din se kabhī raat se Takrātī hai

ek kashtī ka.ī ḳhatrāt se Takrātī hai

dil kī muDbheḌ tirī yaad se hotī hai kahīñ

tīrgī nuur ke zarrāt se Takrātī hai

ek hālat kā koī haal nahīñ hai mujh meñ

ek hālat hai ki hālāt se Takrātī hai

aah ke chīthḌe āfāq meñ uḌte haiñ kahīñ

be-kasī arz-o-samāvāt se Takrātī hai

raah paatī nahīñ manzar se nikalne ke liye

hairat apne hī tilismāt se Takrātī hai

kā.enāteñ mirī tashrīh-talab haiñ ab tak

ik musāvāt musāvāt se Takrātī hai

saañs hotī nahīñ hastī kī numū meñ haa.il

ruuh kab jism ke ḳhalyāt se Takrātī hai

zabt bhī TuuT na jaa.e kahīñ pushte kī tarah

lahr ḳhatre ke nishānāt se Takrātī hai

garm rahtī hai tire ranj se siine kī fazā

dhuup shīshe ke makānāt se Takrātī hai

silsila aage baḌhātī hai sabā mauj-ba-mauj

ek baat aglī kisī baat se Takrātī hai

nā-tavānā.ī tavānā.ī kī hī shakl na ho

piirī sar bāb-e-munājāt se Takrātī hai

mutasādim hai farāmoshī farāmoshī se

saañs shabnam ke buḳhārāt se Takrātī hai

dil hai mā-qabl-e-qadīm aañkh hai mā-ba.ad-e-jadīd

hastī apne hī tazādāt se Takrātī hai

be-ḳhayālī ke kināre pe kahīñ baiThā huuñ

ek lahr aatī hai jazbāt se Takrātī hai

us kī aamad bhī tavārud kī tarah hai 'shāhid'

ḳhabar auroñ ke ḳhayālāt se Takrātī hai

jaan kabhi din se kabhi raat se Takraati hai

ek kashti kai KHatraat se Takraati hai

dil ki muDbheD teri yaad se hoti hai kahin

tirgi nur ke zarraat se Takraati hai

ek haalat ka koi haal nahin hai mujh mein

ek haalat hai ki haalat se Takraati hai

aah ke chithDe aafaq mein uDte hain kahin

be-kasi arz-o-samawat se Takraati hai

rah pati nahin manzar se nikalne ke liye

hairat apne hi tilismat se Takraati hai

kaenaten meri tashrih-talab hain ab tak

ek musawat musawat se Takraati hai

sans hoti nahin hasti ki numu mein hail

ruh kab jism ke KHalyat se Takraati hai

zabt bhi TuT na jae kahin pushte ki tarah

lahr KHatre ke nishanat se Takraati hai

garm rahti hai tere ranj se sine ki faza

dhup shishe ke makanat se Takraati hai

silsila aage baDhati hai saba mauj-ba-mauj

ek baat agli kisi baat se Takraati hai

na-tawanai tawanai ki hi shakl na ho

piri sar bab-e-munajat se Takraati hai

mutasadim hai faramoshi faramoshi se

sans shabnam ke buKHaraat se Takraati hai

dil hai ma-qabl-e-qadim aankh hai ma-baad-e-jadid

hasti apne hi tazadat se Takraati hai

be-KHayali ke kinare pe kahin baiTha hun

ek lahr aati hai jazbaat se Takraati hai

us ki aamad bhi tawarud ki tarah hai 'shahid'

KHabar auron ke KHayalat se Takraati hai