jaan ke usne yun na paDha ho ye bhi to ho sakta hai

jaan ke us ne yuuñ na paḌhā ho ye bhī to ho saktā hai

merī ġhazal kā vo maqtā ho ye bhī to ho saktā hai

rang-e-hinā meñ ḳhūn-e-vafā ho ye bhī to ho saktā hai

aaj bhī us kā zaḳhm harā ho ye bhī to ho saktā hai

tark-e-vafā kī baat na pūchho dil ke hazāroñ pahlū haiñ

ba.ad meñ vo bhī pachhtāyā ho ye bhī to ho saktā hai

bāhar bāhar ḳhāmoshī hai lekin is ḳhāmoshī meñ

andar andar shor machā ho ye bhī to ho saktā hai

palkeñ haiñ kuchh bhārī bhārī utrā utrā hai chehra

raat ko vo bhī so na sakā ho ye bhī to ho saktā hai

jab bhī dekho us patthar par kaa.ī jamī sī rahtī hai

us ke nīche ik chashma ho ye bhī to ho saktā hai

niiñd nahīñ kyuuñ aatī 'shabnam' raat guzartī jaatī hai

shāyad vo bhī jaag rahā ho ye bhī to ho saktā hai

jaan ke us ne yun na paDha ho ye bhi to ho sakta hai

meri ghazal ka wo maqta ho ye bhi to ho sakta hai

rang-e-hina mein KHun-e-wafa ho ye bhi to ho sakta hai

aaj bhi us ka zaKHm hara ho ye bhi to ho sakta hai

tark-e-wafa ki baat na puchho dil ke hazaron pahlu hain

baad mein wo bhi pachhtaya ho ye bhi to ho sakta hai

bahar bahar KHamoshi hai lekin is KHamoshi mein

andar andar shor macha ho ye bhi to ho sakta hai

palken hain kuchh bhaari bhaari utra utra hai chehra

raat ko wo bhi so na saka ho ye bhi to ho sakta hai

jab bhi dekho us patthar par kai jami si rahti hai

us ke niche ek chashma ho ye bhi to ho sakta hai

nind nahin kyun aati 'shabnam' raat guzarti jati hai

shayad wo bhi jag raha ho ye bhi to ho sakta hai