jaan ki bari hai ab dil ka ziyan aisa na tha

jaan kī baarī hai ab dil kā ziyāñ aisā na thā

ḳhair jo kuchh bhī huā ham ko gumāñ aisā na thā

saḳht jaisī ab hai qadmoñ meñ zamīñ aisī na thī

sar pe jaisā ab hai bhārī āsmāñ aisā na thā

ik zamāna ho gayā is raah se guzre hue

ye galī aisī nahīñ thī ye makāñ aisā na thā

thā ḳhas-o-ḳhāshāk kī mānind apnā hī vajūd

sirf ham par hī girī hoñ bijliyāñ aisā na thā

us kināre kā tasavvur meñ bhī aanā hai muhāl

thā to pahle se samundar be-karāñ aisā na thā

apnī nākāmī to pahle se muqaddar thī 'shakīl'

ham pe kuchh mushkil rahā ho imtihāñ aisā na thā

jaan ki bari hai ab dil ka ziyan aisa na tha

KHair jo kuchh bhi hua hum ko guman aisa na tha

saKHt jaisi ab hai qadmon mein zamin aisi na thi

sar pe jaisa ab hai bhaari aasman aisa na tha

ek zamana ho gaya is rah se guzre hue

ye gali aisi nahin thi ye makan aisa na tha

tha KHas-o-KHashak ki manind apna hi wajud

sirf hum par hi giri hon bijliyan aisa na tha

us kinare ka tasawwur mein bhi aana hai muhaal

tha to pahle se samundar be-karan aisa na tha

apni nakaami to pahle se muqaddar thi 'shakil'

hum pe kuchh mushkil raha ho imtihan aisa na tha