jaan-o-dil sunsan hain ujDe qabilon ki tarah

jān-o-dil sunsān haiñ ujḌe qabīloñ kī tarah

ḳhvāhisheñ ḳhāmosh haiñ bebas fasīloñ kī tarah

yuuñ kiyā bas saañs lene bhar kī fursat dī hameñ

us ne kī ham par masīhā.ī baḳhīloñ kī tarah

jis tarah chāhā hameñ upyog meñ laayā gayā

ham rahe dīvār meñ paivast kīloñ kī tarah

umr bhar karte rahe ham āsmānoñ kā safar

manzileñ chipkī rahīñ qadmoñ se mīloñ kī tarah

ik zarā sī gandh kyā paa.ī ki manDrāne lagīñ

kuchh tamannā.eñ haiñ murda-ḳhor chīloñ kī tarah

vo zamāna aur thā har baat par kahte the jī

ab jirah karne lage bachche vakīloñ kī tarah

jaan-o-dil sunsan hain ujDe qabilon ki tarah

KHwahishen KHamosh hain bebas fasilon ki tarah

yun kiya bas sans lene bhar ki fursat di hamein

us ne ki hum par masihai baKHilon ki tarah

jis tarah chaha hamein upyog mein laya gaya

hum rahe diwar mein paiwast kilon ki tarah

umr bhar karte rahe hum aasmanon ka safar

manzilen chipki rahin qadmon se milon ki tarah

ek zara si gandh kya pai ki manDrane lagin

kuchh tamannaen hain murda-KHor chilon ki tarah

wo zamana aur tha har baat par kahte the ji

ab jirah karne lage bachche wakilon ki tarah